Ռազմական գործողությունների ավարտից հետո այսօր տեղի ունեցավ Կառավարության առաջին նիստը: Կառավարության անդամները մեկ րոպե լռությամբ հարգեցին զոհերի հիշատակը:

Այնուհետև վարչապետը պաշտոնաթող նախարարներին շնորհակալություն հայտնեց և հաջողություն մաղթեց նորանշանակ պաշտոնյաներին:

Վարչապետը նորից նշեց, որ, որպես ՀՀ վարչապետ, իր վրա է վերցնում ստեղծված իրավիճակի ողջ պատասխանատվությունը:

«Գիտակցում եմ, որ ինձ վրա է ոչ միայն մինչ օրս տեղի ունեցածի, այլև հետագա զարգացումների պատասխանատվությունը, արտաքին ու ներքին կայունության և անվտանգության ապահովումը, և նոյեմբերի 18-ին իմ հրապարակած ճանապարհային քարտեզի իրականացումը բացարձակ առաջնահերթություն և անհրաժեշտություն է: Մեր բոլոր ջանքերը պետք է կենտրոնացած լինեն այս խնդրի լուծման վրա»- ասաց Նիկոլ Փաշինյանը:

Գործադիրի ղեկավարը նշեց, որ Կառավարությունը Արցախի բնակիչներին աջակցող արդեն 2 միջոցառում է ընդունել, և այդ միջոցառումների ընդունումը կշարունակվի այնքան, որքան անհրաժեշտ է:

Վարչապետի խոսքով՝ առաջիկայույմ  Կառավարության ուշադրության կենտրոնում է լինելու Սյունիքի և Գեղարքունիքի մարզերի՝ պատերազմից տուժած բնակավայրերի վերականգնումը:

Նիկոլ Փաշինյանը բացարձակ առաջնահերթություն է համարում անհետ կորածների որոնողական աշխատանքների կատարումը և գերիների փոխանակումը:

«Այս խնդիրների վրա մենք աշխատում ենք ամենօրյա ռեժիմով: Հիմնական բարդությունն այն է, որ այս աշխատանքի արդյունավետությունը, ցավոք, կախված է ոչ միայն մեզնից: Զոհվածների ընտանքիների, հաշմանդամություն ստացած անձանց և  պատերազմից տուժած այլ խմբերի և քաղաքացիների սոցիալական պաշտպանության և երաշխիքների գործունեությունը և հետագա կատարելագործումը մեր հրատապ անելիքների ցանկում է: Նույնիսկ այս դժվար ժամանակներում պետք է ստեղծել Հայաստանում բարեփոխումների հետագա շարունակականության երաշխիք: Բարեփոխումների ընդգրկումն  ու օրակարգը պետք է ընդլայնվի ի հայտ եկած նոր մարտահրավերների բերումով», -ասաց նա:

Վերջինիս խոսքով՝ պետք է տեղի ունենա նաև կատարվածի պատճառների վերհանման, պարզաբանման և վերլուծության գործընթաց, և հայ հանրությունը պետք է ստանա հստակ պատասխաններ, թե ինչ է տեղի ունեցել և ինչու: 

«Ժողովուրդը պետք է հասու լինի ճշմարտությանը և որոշումներ կայացնելու հնարավորություն ունենա:  Ըստ այդմ, Կառավարության ամենակարևոր անելիքը Հայաստանի Հանրապետության քաղաքացիների սեփական երկրի և իրավիճակի տերը լինելու զգացողության  և փաստի պահպանումն է, և այս համգամանքի ինստիտուցիոնալ  հզորացումը: Ժողովուրդը պետք է որոշի, թե այդ ապագան ում հետ պետք է կառուցի, և այդ ապագայի կառուցման գործում ով և ինչպիսի  դերակատարություն պիտի ունենա»,- եզրափակեց վարչապետը: