Ռուսաստանի Դաշնության նախագահ Վլադիմիր Պուտինը Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի նիստին խոսել է նաև Արցախում տիրող իրավիճակից, ինչպես նաև հրադադարի հաստատման վերաբերյալ եռակողմ հայտարարությունից:

«Հայաստանի իշխանությունները ստիպված են եղել շատ բարդ որոշում ընդունել, որոնք, սակայն, անհրաժեշտ են եղել ժողովրդի համար: Այդ որոշումները ցավոտ էին, և վարչապետից մեծ տղամարդկություն էին պահանջում»,- նշել է ՌԴ նախագահը:

Անդրադառնալով եռակողմ հայտարարությանը՝ Վլադիմիր Պուտինը նշեց, որ դրա կետերը հետևողականորեն կատարվում են, և ռուս խաղաղապահները տեղակայված են շփման գծի ու Լաչինի միջանցքի ամբողջ երկայնքով:

Ռուսաստանի նախագահը նաև ասել է՝ բոլորին հայտնի է, որ Ռուսաստանից ակտիվ միջնորդական ջանքեր պահանջվեցին Լեռնային Ղարաբաղի հակամարտության գոտում արյունահեղությունը կանգնեցնելու, ամբողջական հրադադար հաստատելու և կայունացման գործընթաց սկսելու համար:

«Միևնույն ժամանակ մենք հետևել ենք առանցքային պայմանավորվածություններին, որոնք ձեռք էր բերել ԵԱՀԿ Մինսկի խումբը, մասնավորապես համանախագահ երկրները՝ Ռուսաստանը, ԱՄՆ-ն և Ֆրանսիան»,- ասել է Վլադիմիր Պուտինը:

ՌԴ նախագահը կարևորել է նաև մարտական գործողությունների շրջանում տուժած մարդկանց օգնությանը վերաբերող հարցերը, մասնավորապես փախստականների վերադարձը, վնասված ենթակառուցվածքների վերականգնումը, պատմության, կրոնի և մշակույթի հուշարձանների պաշտպանությունը: Պուտինը կոչ է արել ՀԱՊԿ և ԱՊՀ երկրներին հումանիտար օգնություն ցուցաբերել Արցախին:

Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։

Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:

Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:

Լուսանկարը՝ РИА Новости / Алексей Никольский