Ռուս խաղաղապահները հատուկ նշանակության բժշկական ստորաբաժանման կազմից ստեղծել են բազմաֆունկցիոնալ բժշկական բրիգադներ Լեռնային Ղարաբաղի Ասկերանի շրջանում ռազմական բժիշկների դաշտային աշխատանքներն ապահովելու համար: Այս մասին հայտնում է Ռուսաստանի պաշտպանության նախարարությունը:

Բժշկական բրիգադների կազմում ընդգրկված են տարբեր պրոֆիլի բժիշկներ, ինչպես նաև մասնագետներ հոգեբանական ծառայությունից, որոնք օգնություն են ցուցաբերում հեռավոր գյուղերում և շրջաններում ապրող մարդկանց:

Ըստ ՌԴ պաշտպանական գերատեսչության տարածած հաղորդագրության՝ տեղի բնակիչների գանգատները հիմնականում կապված են տարբեր խրոնիկ հիվանդությունների սրման հետ, ինչպես նաև սիրտ-անթոային և էնդոկրին համակարգերի հետ: Ցուցաբերվում է նաև ստոմատոլոգիական օգնություն:

Հատուկ նշանակության բժշկական ստորաբաժանման կազմում աշխատում են բժշկական 60 մասնագետներ, որոնց թվում՝ ռազմական վիրաբույժներ, անեսթեզիոլոգ-ռեանիմատոլոգներ, թերապևտներ և համաճարակաբաններ:

Ավելի վաղ, բժշկական ստորաբաժանումը Իլ-76 ռազմատրանսպորտային օդանավով Խաբարովսկի օդանավակայանից ժամանել էր Երևան, որտեղից էլ տեղափոխվել է Ստեփանակերտ:

Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։

Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:

Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:

Լուսանկարը՝ РИА Новости / Валерий Мельников