Կառավարության այսօրվա՝ դեկտեմբերի 17-ի նիստը վարում էր փոխվարչապետ Տիգրան Ավինյանը: Մինչ օրակարգային հարցերի քննարկումը՝ փոխվարչապետը հայկական կողմի գերիների, Խծաբերդ և Հին Շեն համայնքների վերաբերյալ տեղեկատվություն հաղորդեց:

Տիգրան Ավինյանը հիշեցրեց, որ այս շաբաթ տեղի ունեցավ գերիների փոխանակման առաջին փուլը:

«Շարունակական աշխատանքներ են տեղի ունենում գերիների տվյալների ճշտման և հետագա փոխանակման քայլերի հետ կապված: Այս առումով բանակցություններ են ընթանում ադրբեջանական կողմի հետ՝ Կարմիր խաչի և ռուսական կողմի ներգարվվածությամբ»,- ասաց նա:

Խծաբերդում տեղի ունեցած միջադեպի և գերեվարված  անձանց հետ կապված Ավինյանը հայտնեց, որ նրանց մասին տվյալներն այս պահին ճշտվում են:

«Գլխավոր շտաբի պետ Օնիկ Գասպարյանն այսօր գնվում է Արցախում այս և այլ հարցերի կապակցությամբ տեղում լուծումները հասկանալու և քննարկումներ իրականացնելու համար: Մոտակա ժամանակներում ակնկալում ենք հանգուցալուծում»,- նշեց նա:

Փոխվարչապետի խոսքով՝ որոշակի լարվածություն եղել է նաև Հին Շեն համայնքում.

«Այս պահի դրությամբ միջդիրքային հաղորդակցությունը առկա է, խնդիրն ամբողջապես հանգուցալուծված չէ, բայց այդ հատվածում տեղակայված են նաև ռուս խաղաղապահ զորքերը: Ակնկալում ենք, որ մոտակա ժամանակներում Հին Շենի հետ կապված ևս կունենանք վերջնական հանգուցալուծում»:

Վերջինս տեղեկացրեց նաև, որ պաշտպանության նախարարը գտնվում է Սյունիքում:

«Սյունիքի սահմանների երկայնքով սահմանապահ զորքերը արդեն իրականացնում են տեղակայման աշխատանքներ»,- հայտնեց փոխվարչապետը:

Տարածքային կառվարման և ենթակառուցվածքների նախարար Սուրեն Պապիկյանն էլ տեղեկացրեց, որ մշտական կապի մեջ է Սյունիքի մարզի իր գործընկերների հետ:

«Իմ ստացած տեղեկատվության համաձայն այս պահին սահմանապահ զորքերի ուժերը տեղաբաշխվում են Հայաստանի սահմանի երկայնքով: Տարբեր մեկնաբանություններից և ապատեղեկատվությունից խուսափելու համար պետք է նշել Հայասատանի Հանրապետության սահմանները, բնականաբար, ամուր են և մեր զինված ուժերի կողմից վերահսկելի են»,- ասաց նախարար Պապիկյանը:

Լուսանկարը՝ կառավարության մամուլի ծառայության