Ռուսաստանի Դաշնության (ՌԴ) նախագահ Վլադիմիր Պուտինն տարեվերջյան իր ասուլիսի ընթացքում անդրադարձել է նաև Լեռնային Ղարաբաղի կարգավիճակին։ ՌԴ նախագահը շեշտել է, որ տարիներ շարունակ Ռուսաստանի դիրքորոշումն այն է եղել, որ Ադրբեջանին պետք է վերադարձվեն Լեռնային Ղարաբաղին հարակից 7 շրջանները։ 

«Ինչ վերաբերում է կարգավիճակին, ապա այն պետք է անփոփոխ մնա, ասյինքն՝ որոշվի ապագայում։ Լեռնային Ղարաբաղում պետք է ստատուս քվո արձանագրվի, սակայն Հայաստանի և Լեռնային Ղարաբաղի պարտադիր հաղորդակցման հնարավորությամբ, ինչի համար էլ նախատեսված է եղել ստեղծել այսպես կոչված Լաչինի միջանցքը, այսինքն՝ Հայաստանը և Լեռնային Ղարաբաղը կապող միջանցքը»,- նշել է Ռուսաստանի նախագահը։

Հիշեցնենք, որ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։

Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:

Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:

Կարդացե՛ք նաև՝

• Պուտինը չի բացառել Արցախում ռուսական խաղաղապահ զորախմբի ավելացումը
• Վլադիմիր Պուտին․ «Լեռնային Ղարաբաղում պատերազմը արտաքին միջամտությամբ չի եղել»

Լուսանկարը՝ РИА Новости / Михаил Климентьев