Գյումրու «Օյունջյան» դպրոց-վարժարանի պատմության դասարանն այսօրվանից կրում է գյումրեցի ավագ լեյտենանտ Վարդգես Մինասյանի անունը, ով զոհվել է սեպտեմբերի 28-ին Ջաբրայիլում:

Վաշտի հրամանատար Մինասյանն այն բանից հետո, երբ թշնամին ճակատային գրոհ էր ձեռնարկել պաշտպանության բանակի մարտական դիրքերից մեկի վրա, հրաման էր ստացել իր զորքով օգնության հասնել դիրքին: Մեկնել էին երկու մեքենայով՝ մոտ 40 հոգով: Տեղ հասնելուց հետո Վարդգեսը հասցրել էր տեղավորել զինվորներին: Նրանցից մեկին, ով կորցրել էր զրահաբաճկոնը, հրամանատարը տվել էր իրենը: Շատ չանցած Մինասյանը մահացու բեկորային վնասվածք էր ստացել հենց սրտի հատվածում:

Ավագ լեյտենանտ Վարդգես Մինասյանը Արցախի Հանրապետության նախագահի հրամանագրերով հետմահու պարգեւատրվել է «Արիության համար» եւ «Մարտական ծառայություն» մեդալներով: Այսօր «Օյունջյան» դպրոց-վարժարանում պարգեւները սպայի մորն են հանձնել Արցախից ժամանած զինվորականները:

Պատերազմից օրեր առաջ Վարդգեսը ճանաչվել էր իր զորամասի լավագույն վաշտի հրամանատար: