Կառավորությունը մարտի 11-ի նիստում որոշեց «Էնջինփրոջեքթ Քոմ» ՓԲԸ-ին 5 տարով ներառել «ԷԿՈՍ» ազատ տնտեսական գոտու շահագործողների ռեեստրում բարձր և տեղեկատվական տեխնոլոգիաների ոլորտում գործունեության իրականացման համար: 

Հիշեցնենք, որ  ազատ տնտեսական գոտին ստեղծել է «Էկոս» ՓԲԸ-ն, որը փոխկապակցված է ռուսաստանաբնակ գործարար Սամվել Կարապետյանի հետ։

Էլեկտրոնային ռեգիստրում «Էնջինփրոջեքթ Քոմ» ընկերության գրանցման ամսաթիվը 2020 թվականի նոյեմբերի 26-ն է։ Ըստ Զինծառայողների ապահովագրության հիմնադրամի «Պարտադիր վճարումներ» բաժնում կատարած վճարի՝ ընկերությունը դեկտեմբեր ամսվա համար վճարել է 1000 դրամ, այսինքն՝ տվյալ պահին ունեցել է 1 աշխատող։

Էկոնոմիկայի նախարար Վահան Քերոբյանի խոսքով՝ նորաստեղծ ընկերությունը պլանավորում է բարձր վարձատրությամբ 11 աշխատակից ունենալ՝ շուրջ 560 000 դրամ միջին ամսական աշխատավարձով:

Ըստ նրա՝ «Էկոս» ազատ տնտեսական գոտում այս պահին կա 8 շահագործող, որից ակտիվ է ընդամենը 3-ը։

Ծրագրի շրջանակներում (2021-2025 թթ.) իրականացվելիք ներդրումները կկազմեն 112 մլն 220 հազար դրամ։