Երևան քաղաքի ընդհանուր իրավասության դատարանը՝ նախագահությամբ դատավոր Դավիթ Բալայանի, քիչ առաջ ոչ իրավաչափ ճանաչեց Գորիսի փոխքաղաքապետ Մենուա Հովսեփյանին ձերբակալելու վերաբերյալ Քննչական կոմիտեի քննիչի որոշումը։ Այս մասին «Հետք»-ի հետ զրույցում ասաց Հովսեփյանի պաշտպան Դավիթ Կարապետյանը։

Հիշեցնենք, որ Հովսեփյանը ձերբակալվել էր Քրեական օրենսգրքի 38-258-րդ հոդվածի 1-ին մասով նախատեսված արարք կատարելու կասկածանքով, այսինքն՝ խուլիգանություն կազմակերպելը։ Նիկոլ Փաշինյանի՝ ապրիլի 20-ին և 21-ին Սյունիք կատարած այցի ընթացքում մարզի մի շարք համայնքներում բողոքի ակցիաներ են տեղի ունեցել, որոնց առթիվ հարուցվել է քրեական գործ՝ իշխանության ներկայացուցչի նկատմամբ բռնություն գործադրելու և խուլիգանության հոդվածներով։

Հովսեփյանը բերման ենթարկվելուց հետո հաղորդում է ներկայացրել հանցագործության մասին՝ հայտնելով, որ իր նկատմամբ ոստիկանությունում, մինչև Քննչական կոմիտե ներկայացնելը, նվաստացուցիչ վերաբերմունք են ցուցաբերել։

Լուսանկարում՝ Դավիթ Բալայանը