Երևան քաղաքի ընդհանուր իրավասության դատարանը՝ նախագահությամբ դատավոր Մանվել Շահվերդյանի, քիչ առաջ ոչ իրավաչափ ճանաչեց Մեղրիի համայնքապետ Մխիթար Զաքարյանի ձերբակալման որոշումը։ Այս մասին «Հետք»-ի հետ զրույցում ասաց Զաքարյանի պաշտպան Գայանե Պապոյանը։

Հիշեցնենք, որ Մխիթար Զաքարյանը ձերբակալվել էր Քրեական օրենսգրքի 258-րդ հոդվածի 3-րդ մասի 1, 2 և 5-րդ կետերով, այսինքն՝ խուլիգանությունը, որը կատարվել է մի խումբ անձանց կամ կազմակերպված խմբի կողմից, զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով և բացառիկ ցինիզմով։

Գայանե Պապոյանն ասաց, որ այսօր Քննչական կոմիտեն նույն հոդվածով նաև մեղադրանք է առաջադրել Զաքարյանին։

Զաքարյանն անցնում է ապրիլի 20-ին և 21-ին Նիկոլ Փաշինյանի՝ Սյունիք կատարած այցի ընթացքում մարզի մի շարք համայնքներում տեղի ունեցած  բողոքի ակցիաների առթիվ հարուցված քրեական գործով։

Նշենք, որ Փաշինյանը Սյունիքիում այցելել է Շուռնուխ համայնք, որտեղ քաղաքացիներն ընդվզել և դժգոհություն են հայտնել։ Չնայած սյունեցիների դժգոհություններին՝ նա նաև եղել է Ագարակում, Մեղրիում ու Կապանում, որտեղ ևս նրան բողոքի ակցիաներով են դիմավորել, վիրավորական արտահայտություններ հնչեցրել, ճանապարհ փակել։ Մեղրիում քաղաքացիների և ոստիկանների միջև բախումներ են տեղի ունեցել։