«Իմ քայլը» խմբակցության ղեկավար Լիլիթ Մակունցն այդպես էլ միանշանակ չպնդեց, որ Հայաստանի եւ Ադրբեջանի միջեւ սահմանագծման եւ սահմանազատման մասին շրջանառվող փաստաթղթում Հայաստանի տարածքային ամբողջականությանը վնասող որևէ դրույթ չկա, միայն նշեց` իր տեղեկություններով՝ ռուսական կողմը Հայաստանին առաջարկել է համատեղ եռակողմ հանձնաժողով ստեղծել` քննարկելու դելիմիտացիայի և դեմարկացիայի հարցերը:

Այս մասին խորհրդարանում լրագրողների հետ զրույցում ասաց Մակունցը:

«Իմ տեղեկություններով՝ հայկական կողմն արձագանքնել է, որ աշխատանքային խումբ ձևավորելու ցանկացած հնարավորություն կարող է լինել միայն այն պարագայում, եթե Ադրբեջանի զինված ուժերն ամբողջությամբ լքեն Հայաստանի տարածքը»,- ասաց նա:

Վարչապետի պաշտոնակատար Նիկոլ Փաշինյանը, կառավարության նիստում անդրադառնալով սոցցանցերում քննարկվող փաստաթղթին, ասաց, որ կա աշխատանքային փաստաթուղթ, սակայն կոռեկտ չէ դրա վերաբերյալ մանրամասներ ներկայացնել: Փաշինյանը նաև ընդգծեց` Ադրբեջանի կողմից պայմանավորվածությունները կյանքի կոչելու դեպքում պատրաստ է այն ստորագրել, քանի որ փաստաթուղթը 100%-ով համապատասխանում է Հայաստանի ազգային շահին:

Մակունցը նշեց` փաստաթղթի մանրամասներից տեղյակ չէ, ուստի որևէ տեղեկություն հաղորդել չի կարող:

Անդրադառնալով Հայաստանի տարածքից որևէ գյուղ Ադրբեջանին զիջելու մասին խոսակցություններին՝ Լիլիթ Մակուցն ասաց. «Իմ տեղեկություններով՝ չկա որևէ հարց, որի մասին նշեցիք: Կարծում եմ` դժվար չէ գուշակել այն, ինչ հրապարակվել է, եթե նման բան լիներ, որևէ բան չէր խանգարում տվյալ անձանց ոչ թե փակել այդ հատվածները, այլ հրապարակել դրանք»:

Մակունցի խոսքով` զարգացումներ լինելու դեպքում վարչապետի պաշտոնակատարն այդ մասին կխոսի: Խորհրդարանական մեծամասնության ղեկավարն այդպես էլ չհստակեցրեց` արտահերթ նիստին կմասնակցե՞ն, թե ոչ, ասաց` նախագծի հիմնավորումներից է կախված: