Ռուսաստանի նախագահ Վլադիմիր Պուտինը Եվրախորհրդի նախագահ Շառլ Միշելի հետ քննարկել է Արցախում առկա իրավիճակը՝ հաշվի առնելով Ռուսաստանի, Ադրբեջանի և Հայաստանի առաջնորդների հայտարարությունների հետագա իրականացման կարևորությունը։ Այդ մասին հայտնում է Կրեմլի մամուլի ծառայությունը։ 

«Քննարկվել է Արցախում առկա իրավիճակը՝ հաշվի առնելով Ռուսաստանի, Ադրբեջանի և Հայաստանի առաջնորդների 2020 թվականի նոյեմբերի 9-ի և 2021 թվականի հունվարի 11-ի հայտարարությունների հետագա իրականացման կարևորությունը։ Առաջնային խնդիրների շարքում նշվել են տարածաշրջանում տնտեսական և տրանսպորտային հաղորդակցությունների ապաշրջափակումը, բնակչության հումանիտար խնդիրների լուծումը։ Շառլ Միշելն իր աջակցությունն է հայտնել իրականացվող աշխատանքին, այդ թվում՝ ԵԱՀԿ Մինսկի խմբի համանախագահների գծով»,- նշվում է հաղորդագրության մեջ։

Հիշեցնենք, որ 2021 թվականի հունվարի 11-ին Մոսկվայում Ռուսաստանի, Հայաստանի և Ադրբեջանի ղեկավարների հանդիպման արդյունքներով ընդունվել էր համատեղ հայտարարություն, համաձայն որի՝ ձևավորվեց տարածաշրջանում տրանսպորտային և տնտեսական ուղիների ապաշրջափակման հարցերով զբաղվող եռակողմ աշխատանքային խումբ՝ երեք երկրների փոխվարչապետների համանախագահությամբ։ Աշխատանքային խմբում Հայաստանը ներկայացնում է փոխվարչապետ Մհեր Գրիգորյանը։ Ավելի ուշ, Մհեր Գրիգորյանը հայտարարել էր, որ աշխատանքային խմբի աշխատանքները չեն շարունակվում։

Լուսանկարը՝ Reuters գործակալության