Երևան քաղաքի ընդհանուր իրավասության դատարանը՝ նախագահությամբ դատավոր Վաչե Մարգարյանի, հրապարակեց որոշում, որով բավարարեց Երևանի Ամիրյան փողոցում հնչած կրակոցների գործով մեղադրյալ Ռոբերտ Սուքիասյանին կալանավորելու վերաբերյալ Քննչական կոմիտեի միջնորդությունը: Այս մասին «Հետք»-ի հետ զրույցում ասաց Սուքիասյանի պաշտպան Գոռ Միքայելյանը:

Պաշտպանը նաև տեղեկացրեց, որ դատարանը մերժել է իր բողոքը՝ Սուքիասյանի ձերբակալման որոշման դեմ: Ռոբերտ Սուքիասյանը, հիշեցնենք, գործարար, «Քաղաքացիական պայմանագիր» կուսակցության ցուցակով պատգամավոր ընտրված Խաչատուր Սուքիասյանի եղբայրն է։

Նա մեղադրվում է Քրեական օրենսգրքի 258-րդ հոդվածի 4-րդ մասով նախատեսված արարք կատարելու մեջ, այսինքն` խուլիգանությունը, որը կատարվել է զենք կամ որպես զենք օգտագործվող առարկայի գործադրմամբ: Հուլիսի 18-ին Ամիրյան փողոցում մի քանի անձանց միջև վիճաբանություն է սկսել, որի ընթացքում գործածվել է հրազեն, ինչպես նաև դանակ: Միջադեպի ընթացում ոտքի շրջանում հրազենային վնասվածք է ստացել 42-ամյա մի տղամարդ, որը ԱՄՆ քաղաքացի է:

Նշենք, որ Սուքիասյանի պաշտպան Գոռ Միքայելյանը երեկ բարձրաձայնել է այն մասին, որ Ռոբերտ Սուքիասյանին կալանավորելու միջնորդությունը ներկայացնելիս վերջինիս մեղադրանք առաջադրված չի եղել:

Այս խնդրի վերաբերյալ դեռ տարիներ առաջ՝ Վճռաբեկ դատարանը դիրքորոշում է հայտնել, որ քրեական վարույթն իրականացնող մարմնի` կալանավորումը որպես խափանման միջոց կիրառելու միջնորդության քննարկման արդյունքներով դատարանն ի թիվս այլնի՝ պետք է պարզի կալանավորման ինքնուրույն պայմանի առկայությունը, մասնավորապես, այն, թե արդյոք անձին տրվել է մեղադրյալի դատավարական կարգավիճակ: Նշված հանգամանքը պարզելու նպատակով դատարանը պարտավոր է ստուգել, թե նախաքննության մարմնի կողմից ներկայացվե՞լ են արդյոք համապատասխան տեղեկություններ, փաստեր կամ ապացույցներ այն մասին, որ անձին որպես մեղադրյալ ներգրավելու մասին որոշում է կայացվել, անձը տեղեկացվե՞լ է այդ որոշման մասին, բացի դրանից, նրան պարզաբանվե՞լ է առաջադրված մեղադրանքի էությունը, և հանձնվե՞լ են որպես մեղադրյալ ներգրավելու մասին որոշման պատճենն ու մեղադրյալի իրավունքների և պարտականությունների ցանկը: Հակառակ պարագայում անձի կալանավորումը և համապատասխանաբար նաև նրա ազատության և անձնական անձեռնմխելիության իրավունքի սահմանափակումը կհամարվի կամայական և անօրինական:

Վճռաբեկ դատարանի այս դիրքորոշումը մեջբերելով՝ Գոռ Միքայելյանը պնդում էր, որ անգամ մեծ ցանկության դեպքում դատավոր Վաչե Մարգարյանը չի կարող Սուքիասյանի նկատմամբ կալանավորումն ընտրել՝ որպես խափանման միջոց: Բայց, փաստորեն, դատավոր Մարգարյանը կայացրել է կալանավորման վերաբերյալ որոշում: