![](/static/articles/13/42/67/l-vIpuZfWQ9u.jpg)
Ընդդիմությունը պահանջում է Արցախի հարցով մշտական հանձնաժողով ձևավորել
Խորհրդարանի հերթական նիստում քննարկվում է ընդդիմության ներկայացրած Արցախի հարցով մշտական հանձնաժողով ձևավորելու հարցը: «Պատիվ ունեմ» խմբակցության ղեկավար Արթուր Վանեցյանն իր ելույթում կարևորեց նման հանձնաժողովի ստեղծումը` պնդելով, որ այն հստակ քաղաքական ուղերձ է թե՛ արցախահայությանը, թե՛ Ադրբեջանին ու Թուրքիային և թե՛ միջազգային հանրությանը: Ըստ նրա` այդ կերպ աշխարհը կտեսնի, որ Հայաստանը չի հրաժարվել Արցախից և ձեռքերը չի լվացել վերջինից:
Վանեցյանը հիշեցրեց, որ ժամանակին Գերագույն խորհրդի կազմում գործում էր Արցախի հարցով ժամանակավոր հանձնաժողով, այժմ էլ նման հանձնաժողովի կարիք կա:
«Եթե հանձնաժողով ձևավորելու առաջարկը մերժվի, կարող ենք հիմնավոր կասկած ունենալ, որ քաղաքական մեծամասնությունը փորձում է լվանալ ձեռքերն Արցախից»,- ասաց նա:
«Հայաստան» խմբակցության պատգամավոր Արթուր Ղազինյանն իր ելույթում պնդեց` իշխանությանը Արցախ չեն վստահում:
«Կարծում եմ, որ պետք է ստեղծվի Արցախի հարցով մշտական հանձնաժողով, և այն պետք է ղեկավարի ընդդիմությունը, հանձնաժոովը պետք է դառնա համազգային ուղեղային կենտրոն` Արցախի հարցով մշակվող հանրային և պետական քաղաքկանության համար»,- ասաց Ղազինյանը:
Ըստ ընդդիմադիր պատգամավորի` նման հանձնաժողովի ստեղծումը մեսիջ է ամբողջ աշխարհին, որ «Հայաստանը տեր է կանգնում իր պատմական առաքելությանը»:
«Էստեղ հնչեցին թվեր` այսքան ներդրում պետք է անենք, շենքեր սարքենք, դրա կարիքը չկա, ժողովուրդ, ձեր ղեկավարին ասեք` թող մեկ անգամ գնա Արցախ, իր հռչակած Հայաստանը թող գնա մեքենայով: Վերջին անգամ, իմ տեղեկություններով, ութ-ինը ամիս առաջ է եղել, թող գնա` հայտարարի Արցախը Հայաստան է և վերջ»,- ասաց նա:
Պատգամավորն իր ելույթում խոսեց նաև սահմանային իրավիճակից` ասելով, որ մինչ քննարկում են հանձնաժողովի ձևավորման հարցը, Երասխում երկու ժամ է թնամին կրակում է, այն էլ` խոշոր տրամաչափի զենքերով:
«Եվ որևէ արձագանք չունենք, լրջացեք, մենք էն վիճակում չենք, որ ձեզ Արցախ վստահենք, վստահեցինք ու տեսանք՝ ինչ եղավ»,- ասաց նա:
Նույն խմբակցության պատգամավոր Գեղամ Մանուկյանն էլ ասաց, թե որքան էլ Արցախի վերաբերյալ իշխանություները ճառի, միևնույն է, ունենք լքված Արցախ: Մանուկյանն անդրադարձավ Տավուշում ռուս սահմանապահների ուղեկալի տեղադրման հարցին` ասելով, որ պաշտոնապես դիմել են ՊՆ պարզաբանում ստանալու համար:
Նա ընթերցեց ՔՊ-ական պատգամավոր Վահե Ղալումյանի ճեպազրույցից մի հատված, որտեղ նա ասել է, որ Տավուշում կան ադրբեջանական գյուղեր, որոնք գտնվում են Հայաստանի տիրապետության տակ, և չի բացառում որ դրանք փոխանակվեն: Նա հարց հնչեցրեց, թե արդյոք թուրքին հող տալու մասին պատրաստակամության հայտարարությունը դավաճանություն է, թե ոչ: Նա նաև համոզմունք հայտնեց, որ հավանաբար Ղալումյանը պատմում է այն, ինչ կուլիսներում իշխանությունը քննարկում է, սակայն չի բարձրաձայնում:
Մեկնաբանություններ (1)
Մեկնաբանել