Թալիբները շուտով կհայտարարեն Աֆղանստանի նոր կառավարության կազմը
Աֆղանստանի նոր կառավարության կազմը շուտով կհայտարարվի, սակայն հստակ ժամկետներ դեռևս չկան։ Այդ մասին ռուսական TACC գործակալությանը հայտնել է «Թալիբան» շարժման Քաթարի քաղաքական գրասենյակի պաշտոնական ներկայացուցիչ Մոհամեդ Սոհայլ Շահինը՝ պատասխանելով այն հարցին, թե արդյոք սեպտեմբերի 8-ին նախատեսվում է կառավարության նոր կազմի հրապարակում։
«Ես չեմ կարող հաստատել կոնկրետ ժամկետ, սակայն սպասվում է, որ այն (խմբ. կառավարության կազմը) շուտով կհայտարարվի»,- նշել է նա։ Ավելի վաղ, TACC-ի աղբյուրը հայտնել էր, որ Աֆղանստանի նոր կառավարության կազմը նախատեսվում է հայտարարել սեպտեմբերի 8-ին։
«Թալիբան» շարժումը, Աֆղանստանից ամերիկյան զորքերի դուրսբերումից հետո, իր իշխանությունն է հաստատել այդ երկրի գրեթե ողջ տարածքում։ Օգոստոսի 15-ին Աֆղանստանի նախագահ Աշրաֆ Ղանին լքել էր երկիրը, իսկ գրոհայիններն առանց դիմադրության մտել էին Քաբուլ։ Փանջշեր պրովինցիայում դիմադրության ուժերը սկսել էին պայքար ծավալել թալիբների դեմ։ Երկուշաբթի օրը՝ սեպտեմբերի 6-ին շարժման ներկայացուցիչ Զաբիհուլա Մուջահիդը հայտարարել էր, որ Փանջշերը ևս անցել է թալիբների վերահսկողության տակ, իսկ Աֆղանստանում պատերազմն ավարտվել է։
Լուսանկարը՝ Associated Press գործակալության
Մեկնաբանել