Գ. Ջհանգիրյան. «Թե ես ու գործադիրի ղեկավարն ինչ հարաբերությունների մեջ ենք, իմ ու իր անձնական խնդիրն է»
Բարձրագույն դատական խորհուրդը Վճռաբեկ դատարանի քաղաքացիական և վարչական պալատի դատավորի թափուր տեղի համար առաջադրել էր Հովսեփ Բեդևյանի, Հրաչ Այվազյանի և Լիանա Հակոբյանի թեկնածությունները: Խորհրդարանն այս երեք թեկնածուից ընտրելու է մեկին:
Թեկնածուներին ներկայացրեց ԲԴԽ նախագահի պաշտոնակատար Գագիկ Ջհանգիրյանը:
«Պատիվ ունեմ» խմբակցության պատգամավոր Թագուհի Թովմասյանը, դիմելով ԲԴԽ նախագահի պաշտոնակատարին, նկատեց, որ վերջինիս անվան հետ կապված պարբերաբար մտահոգիչ տեղեկություններ է ստանում, որ դատավորները նրա հետ են համաձայնեցնում վճիռները:
Ջհանգիրյանն արձագանքեց` քաղաքական գնահատականներից պետք է զերծ մնալ, սակայն պատգամավորն իր հասցեին կոնկրետ մեղադրանք է հնչեցնում: Նա հիշեցրեց, որ ԲԴԽ-ն կոլեգիալ մարմին է, և խորհրդի նախագահը որևէ առանձին լիազորությամբ օժտված չէ, ԲԴԽ-ն նույնիսկ որևէ դատավարական գործառույթով օժտված չէ:
ԲԴԽ նախագահի պաշտոնակատարը պնդեց` քրեական մասնագիտացմամբ որևէ դատարանի համալրում չի եղել իր պաշտոնավարման շրջանում, այժմ այն դատավորներն են պաշտոնավարում, որոնք նշանակվել են առաջին, երկրորդ, երրորդ նախագահների ժամանակ:
Նա բարձրաձայնեց նաև պատգամավորի հետ ունեցած հեռախոսային խոսակցության մասին. «Ձեզ կալանավորներից որևէ մեկն ասել է, որ ես ճնշել եմ դատավորի: Ես երկրորդ, այնուհետև երրորդ նախագահի պաշտոնավարման շրջանում հանիրավի անցկացրել եմ բանտում, 12 տարի անց արդարացվել, չեմ պատկերացնում ինչպես ես կարող եմ ճնշել դատավորներին, որ ապագայում ևս ՀՀ-ում հանիրավի դատապարտված մարդիկ լինեն»,-ասաց նա:
Թովմասյանը մանրամասնեց` խոսել է կալանավորված պատգամավոր Արմեն Չարչյանի հետ, վերջինս է ահազանգել, որ իր նկատմամբ խոշտանգումներ են իրականացվում Ջհանգիրյանի ցուցումով: Ընդդիմադիր պատգամավորը նաև պնդեց, թե ԲԴԽ նախագահի պաշտոնակատարը ժամանակ առ ժամանակ դատավորների է հյուրընկալում իր սենյակում և համապատասխան ցուցումներ տալիս:
Ջհանգիրյանը զարմացավ` ո՞վ այցելի ԲԴԽ նախագահի աշխատասենյակ, եթե ոչ դատավորները, ապա պնդեց, որ վերջիններս դատարանների առջև ծառացած խնդիրներն են իրեն զեկուցում: Ասաց՝ նորանշանակ դատավորն աշխատանքի առաջին օրը տեղեկանում է, որ իրեն մակագրվել է 954 քաղաքացիական գործ, այդ իրավիճակում ո՞ւմ առջև պետք է իր խնդիրը բարձրաձայնի:
«Հայաստան» խմբակցության պատգամավոր Արեգնազ Մանուկյանը հիշեցրեց, որ Ջհանգիրյանը ձեռնարկատիրական գործունեությամբ չի զբաղվել, երկար տարիներ բարձրաստիճան պաշտոնյա է եղել, ինչպես է հաջողացրել հայտնի թաղամասում առանձնատուն կառուցել, որի ինքնարժեքն իջեցնելու համար այն անվանել է գոմ: Պատգամավորը հետաքրքրվեց, թե արդյոք վերջինս տեղեկացված է, որ Իրաքի դեսպանատունն է այդ գոմում գործունեություն ծավալում, և վերջիններս առանձնատունը վարձակալելիս գիտե՞ին այդ մասին, թե՞ ոչ:
Գագիկ Ջհանգիրյանն արձագանքեց` առանձնատունը վարձակալել են ոչ թե իրենից, այլ որդուց, ապա հիշեցրեց, որ ԲԴԽ անդամ ընտրվելիս մանրամասն ներկայացրել է իր առանձնատան ձեռք բերման պատմությունը:
«Ես գոմ անվանեցի, որովհետև ապարանքներ են մեր տան հարևանությամբ, դրանց համեմատ համեստ տուն է, թող ներեն Իրաքի դեսպանատան աշխատակիցները, որ նման պայմաններում են բնակվում»,- ասաց Ջհանգիրյանը:
Նույն խմբակցության պատգամավոր Ագնեսա Խամոյանը հիշեցրեց Ջհանգիրյանի և վարչապետ Փաշինյանի երբեմնի վատ հարաբերությունները, երբ Փաշինյանը վերջինիս անվանում էր իշխանությունների հաճախորդ, իսկ Ջհանգիրյանն էլ Փաշինյանի հեղինակած Սերժ Սարգսյանին իմպիչմենտ ներկայացնելու նախագիծը որակել էր անգրագիտություն: Պատգամավորը հետաքրքրվեց, թե ինչպես է ստացվել նման հարաբերություններից հետո համագործակցությունը:
«Թե ես ու գործադիրի ղեկավարն ինչ հարաբերությունների մեջ ենք, իմ ու իր անձնական խնդիրն է, չեմ պատրաստվում այդ խոհանոցը ձեր առաջ բացել»,- արձագանքեց ԲԴԽ նախագահի պաշտոնակատարը:
Ինչ վերաբերում է Փաշինյանի հեղինակած որոշման նախագծին, Ջհանգիրյանն ասաց, որ պատգամավորը մեկ կարևոր բառ մոռացել է հիշատակել, ինքն ասել է իրավաբանորեն անգրագիտություն, իսկ թե նման որոշման նախագիծ ով էր գրել, Ջհանգիրյանը չգիտեր:
Հիմնական զեկուցողն ասաց, որ իր թեկնածությունն առաջադրել էր նախորդ խորհրդարանի քաղաքական մեծամասնությունը, ունեցել է նաև ընդդիմադիր խմբակցությունների ղեկավարների հետ պայմանավորվածություն, որ կընտրեն իրեն, սակայն «ինչ-ինչ և ում արգելքներից հետո գրանցվել են և հետո լքել դահլիճը»:
Երկրորդ նախագահ Ռոբերտ Քոչարյանի նախկին փաստաբան, պատգամավոր Արամ Վարդևանյանն էլ հիշեցրեց Քոչարյանի քրեական գործը` ասելով, որ վերջինս կալանավորված է եղել ավելի երկար ժամանակով, քան Ջհանգիրյանը, ապա ՍԴ որոշմամբ 301.1 հոդվածը ճանաչվել է հակասահմանադրական ու քրեական հետապնդումը դադարեցվել:
Վարդևանյանը պնդեց, որ Ջհանգիրյանը մինչ այդ պաշտոնում ընտրվելը ջանասիրաբար պաշտպանում էր այդ հոդվածը, հետաքրքրվեց, թե արդյոք նա պատրաստվում է դիրքորոշում հայտնել, որ քրեական հետապնդումն ապօրինի է եղել և ներողություն խնդրել, որ ժամանակին պաշտպանել է նման «խայտառակ հոդվածով քրեական հետապնդումը»:
Գագիկ Ջհանգիրյանն արձագանքեց` իր դիրքորոշումն արտահայտելիս եղել է անկախ իրավաբան ու արտահայտել մասնագիտական տեսակետ, և անկախ ՍԴ կայացրած որոշումից իր տեսակետը չի փոխել:
Մեկնաբանել