Էկոնոմիկայի նախարար Վահան Քերոբյանը համարում է, որ հարյուրավոր փոքր և միջին տնտեսվարողների մոլորեցրած «Ազգային մոլ» նախագծից տուժողներին օժանդակելու հարցում ինքը գործառույթներ չունի. խնդիրը իրավական համակարգի դաշտում է։

Այս տարվա հունվարի վերջին Երևանի Թբիլիսյան խճուղու տարածքներից մեկում բացված «Ազգային մոլ»  առևտրի կենտրոնում տարածքներ վարձակալած տնտեսվարողները ընդամենը երկու ամիս անց փաստի առաջ են կանգնել՝ կրելով ֆինանսական վնասներ: 

Այս պատմության մասին առավել մանրամասն՝ 

• «Ազգային մոլ»-ից տուժածները. ովքեր են մոլորեցրել հարյուրավոր տնտեսվարողների

Քանի որ հարցը վերաբերում է ոչ թե մեկ կամ երկու տնտեսվարողի, այլ՝ հարյուրավորների, տուժողները համարում են, որ սա ՓՄՁ-ին վերաբերող ընդհանուր խնդիր է և վատ նախադեպ հետագա նախագծերի համար: Նրանց մի քանիսի խնդրանքով՝ վերևում նշված մեր հոդվածը հրապարակելուց հետո Էկոնոմիկայի նախարարից հետաքրքրվել ենք, թե արդյոք տեղյա՞կ է խնդրին և պատրաստվու՞մ է որևէ քայլ ձեռնարկել: 

«ՀՀ էկոնոմիկայի նախարար Վահան Քերոբյանը տեղյակ է Ձեր կողմից բարձրացված խնդրին, սակայն վերջինիս կարգավորումը էկոնոմիկայի նախարարի դաշտում չէ. խնդրի կարգավորումը գտնվում է իրավապահ մարմինների տիրույթում»,- նշված է հարցման պատասխանում, որի ներքո ստորագրել է էկոնոմիկայի նախարարության գլխավոր քարտուղարի տեղակալ Արմինե Խառատյանը:  

 2021 թվականի հունվարի 30-ին Երևանում՝  Թբիլիսյան խճուղի 26/8 հասցեում բացված «Ազգային մոլ» առևտրի կենտրոնի ղեկավարների ու կենտրոնում տարածք վարձակալած հայ արտադրողների միջև ընդամենը երկու ամիս անց վեճեր են առաջացել: Նախագծի կազմակերպիչները տնտեսվարողներից տարածքի վարձակալության մի քանի ամսվա, որոշ դեպքերում էլ՝ տարեկան գումարներ են վերցրել, սակայն բացվելուց մոտ երկու ամիս անց հայտարարել են, որ փակում են առևտրի կենտրոնը և տեղափոխվում մայրաքաղաքի կենտրոն: Եվ չեն վերադարձրել նախապես գանձված գումարները: 

Թբիլիսյան խճուղի 26/8  շենքի սեփականատիրոջ՝ գործարար Ռուբեն Շախմուրադյանի հետ ևս ֆինանսնական խնդիրների մեջ են հայտնվել  «Ազգային մոլ»-ի ղեկավարներ: Շախմուրադյանը պնդում է, որ իրեն խաբել են և տարածքի վարձակալության գումարը պայմանավորված չափով չեն վճարել: Շախմուրադյանը փակել էր շենքի դռները՝ թույլ չտալով, որ տնտեսվարողները ապրանքները հանեն: 

Իրապահաների միջամտությունից հետո ամիսներ անց մեծ մասը հանել են ապրանքները, սակայն վարձակալության վճարները այդպես էլ չեն վերադարձվել։ 

Թե որքան վնաս են կրել տնտեսվարողները, հաշվարկված չէ:

Տես նաև՝

• «Ազգային մոլ»-ում մնացած ապրանքների մեծ մասը վերադարձվել է, իսկ վարձակալության գումարների հարցը մնացել է օդում կախված