ԵԱՀԿ գործող նախագահը Հայաստանին ու Ադրբեջանին կոչ է արել դադարեցնել սահմանային լարվածությունը
ԵԱՀԿ գործող նախագահ և Շվեդիայի արտաքին գործերի նախարար Անն Լինդեն Հայաստանին և Ադրբեջանին կոչ է արել թուլացնել լարվածությունն ու քայլեր ձեռնարկել չլուծված հարցերի կարգավորման համար։
Share deep concern of Minsk Group Co-Chairs regarding reported incidents in the region, including those along Armenia-Azerbaijan border. Express my full support for their efforts & call on sides to de-escalate immediately & take steps to resolve outstanding issues. #OSCE2021SWE
— Ann Linde (@AnnLinde) November 16, 2021
«Կիսում եմ Մինսկի խմբի համանախագահների խորը մտահոգությունը՝ կապված տարածաշրջանում, այդ թվում և Հայաստան-Ադրբեջան սահմանի միջադեպերի հետ: Իմ լիակատար աջակցությունն եմ հայտնում նրանց ջանքերին ու կողմերին կոչ եմ անում անհապաղ թուլացնել լարվածությունն ու քայլեր ձեռնարկել հրատապ հարցերի լուծման նպատակով»,- թվիթերյան իր միկրոբլոգում գրել է շվեդ դիվանագետը։
Այսօր, ավելի վաղ, ՀՀ ԱԳՆ-ն հանդես էր եկել հայտարարությամբ, որտեղ նշվում էր, որ նոյեմբերի 16-ին, Ադրբեջանի զինված ուժերը հարձակում են գործել Հայաստանի Հանրապետության սահմանի արևելյան ուղղությամբ և ներխուժել Հայաստանի Հանրապետության ինքնիշխան տարածք։ «Ադրբեջանական կողմի նախահարձակ գործողությունները հանգեցրել են մարդկային կորուստների։ Այս վերջին հարձակումը Հայաստանի Հանրապետության տարածքներ օկուպացնելու՝ ադրբեջանական կողմի հետևողական քաղաքականության շարունակությունն է, որը սկիզբ է դրվել այս տարվա մայիսի 12-ից՝ Սյունիքի և Գեղարքունիքի մարզեր ադրբեջանական զինված ուժերի ներթափանցմամբ»,- նշվում էր ԱԳՆ հայտարարության մեջ։
Ըստ պաշտոնական տվյալների՝ 17։00-ի դրությամբ՝ ՀՀ զինված ուժերի 12 զինծառայող գերեվարվել է։ «Մարտերի ինտենսիվությունը չի թուլացել։ Հակառակորդը շարունակում է կիրառել հրետանային միջոցներ, զրահատեխնիկա և տարբեր տրամաչափի հրաձգային զինատեսակներ»,- հայտարարել է պաշտպանական գերատեսչությունը։
ՀՀ Անվտանգության խորհրդի քարտուղար Արմեն Գրիգորյանն էլ հայտարարել է, որ Երևանը կդիմի Մոսկվային՝ օգնություն ստանալու համար։ «Քանի որ հարձակումը եղել է Հայաստանի սուվերեն տարածքի վրա, ապա մենք դիմում ենք Ռուսաստանին՝ Հայաստանի և Ռուսաստանի միջև 1997 թվականի պայմանագրի շրջանակում Հայաստանի տարածքային ամբողջականությունը պաշտպանելու կոչով և համաձայնագրի շրջանակում փոխադարձ պարտականություններն իրագործելու տրամաբանության շրջանակներում»,- նշել է Անվտանգության խորհրդի քարտուղար Արմեն Գրիգորյանը։ Ըստ նրա՝ հայկական կողմն ակնկալում է, որ ՌԴ-ն օգնություն կտրամադրի և հնարավորություն կլինի վերականգնելու Հայաստանի տարածքային ամբողջականությունը։
Լուսանկարը՝ Անն Լինդեի թվիթերյան միկրոբլոգից
Մեկնաբանել