Նիկոլ Փաշինյան. «Ադրբեջանի ռազմական սադրանքները ուղղված են Հայաստանի տարածքային ամբողջականության խախտմանը»
Ադրբեջանի ռազմական սադրանքները ուղղված են Հայաստանի տարածքային ամբողջականության խախտելուն։ Այդ մասին Եվրասիական միջկառավարական խորհրդի 29-րդ նիստի ժամանակ հայտարարել է ՀՀ վարչապետ Նիկոլ Փաշինյանը։ Վերջինիս խոսքերով՝ Հայաստանը դարձյալ բախվում է իր անվտանգությանը սպառնացող լուրջ մարտահրավերների։
«Չեմ կարող չնշել, որ ինչպես մեկ տարի առաջ, երբ մենք ընդունում էինք միջկառավարական խորհրդի հերթական նիստը, այնպես էլ այսօր Հայաստանը բախվում է լուրջ մարտահրավերների, որոնք սպառնում են մեր անվտանգությանը։ Մեր տարածաշրջանը ներքաշվել է էսկալացիայի նոր փուլի մեջ, որը, դժբախտաբար, հանգեցրել է մարդկային նոր զոհերի»,- նշել է ՀՀ վարչապետը։
Նիկոլ Փաշինյանի պնդմամբ՝ իրավիճակի սրման ողջ պատասխանատվությունը կրում է Ադրբեջանը, որի ռազմական սադրանքները միտված են ՀՀ տարածքային ամբողջականության խախտմանն ու 2020 թվականի նոյեմբերի 9-ի ու 2021 թվականի հունվարի 11-ի եռակողմ հայտարարարություններով ձեռք բերված պայմանավորվածությունների վիժեցմանը։
Հիշեցնենք, որ վերջին օրերին լարված է իրավիճակը հայ-ադրբեջանական շփման գծի արևելյան հատվածում։ Նոյեմբերի 16-ին կողմերի միջև ծավալվել էին մարտական գործողություններ, որի արդյունքում հայկական կողմը, ըստ պաշտոնական տվյալների, ունի 6 զոհ։ Հայկական կողմը հայտարարել էր, որ դիմելու է Ռուսաստանին օգնության համար։
Նոյեմբերի 18-19-ը Երևանում ընթանում է Եվրասիական միջկառավարական խորհրդի նիստը, որին մասնակցում են Եվրասիական տնտեսական միության անդամ երկրների վարչապետները։
Կարեն Դեմիրճյանի անվան մարզահամերգային համալիրում տեղի է ունենում ԵՏՄ երկրների պատվիրակությունների ընդլայնված կազմերով հանդիպումը, որին նախորդել էին վարչապետների դիմավորման և համատեղ լուսանկարման արարողությունները։
Մեկնաբանել