Տավուշի մարզի Նոյեմբերյան խոշորացված համայնքում դեկտեմբերի 5-ին տեղական ինքնակառավարման մարմինների ընտրություններ են։ 

Այս համայնքներում ընտրություններն անցկացվելու են համամասնական կարգով․ քաղաքացիներն ընտրելու են ավագանու կազմը, որն էլ համայնքի ղեկավար է ընտրելու։ (Ըստ օրենքի՝ համամասնական կարգով ընտրում են 4000 և ավելի բնակչություն ունեցող համայնքներում)։ 

Հիշեցնենք, որ կառավարությունը 2021 թ. սեպտեմբերի 8-ի նիստում ընդունեց որոշում, որով առաջարկում էր 441 համայնքի միավորմամբ ձևավորել 37 համայնք։ Դրանցից մեկն էլ Նոյեմբերյան (Նոյեմբերյան, Կողբ, Այրում) համայնքն է։ Օրենքի նախագիծն Ազգային ժողովն ընդունեց սեպտեմբերի 24-ին: 

Դեռեւս 2016թ.-ին Նոյեմբերյան, Կողբ եւ Այրում համայնքները խոշորացվել էին. Նոյեմբերյան քաղաքին միացել էին Բերդավան, Բաղանիս, Դովեղ, Ջուջեվան, Ոսկեպար, Ոսկեվան, Կոթի, Բարեկամավան բնակավայրերը, Կողբին՝ Կողբ եւ Զորական բնակավայրերը և Այրումին՝ Այրում, Արճիս, Բագրատաշեն, Դեղձավան,Դեբեդավան, Լճկաձոր, Հաղթանակ, Պտղավան բնակավայրերը։ 

Նոյեմբերյանում դեկտեմբերի 5-ի ընտրություններին մասնակցում է 3 կուսակցություն՝ «Քաղաքացիական պայմանագիր»-ը, «Ապրելու երկիր»-ը և «Հանուն հանրապետության ժողովրդավարության պաշտպանների դաշինք»-ը։ 

Ո՞վքեր են գլխավորում ընտրական ցուցակները

«Քաղաքացիական պայմանագիր» կուսակցության ընտրական ցուցակը գլխավորում է Նոյեմբերյան համայնքի նախկին ղեկավար, ժ/պ Կարեն Աբազյանը։ 

Նա 2016 թվականի սեպտեմբերի 18-ին կայացած ՏԻՄ ընտրություններում ընտրվել է Նոյեմբերյան համայնքի ղեկավար: 

Նախորդ ընտրությունների ժամանակ եղել է անկուսակցական, իսկ այս` դեկտեմբերի 5-ին կայանալիք ընտրություններին մասնակցում է ՔՊ-ի ցուցակով։ Ընտրական ցուցակում Կարեն Աբազյանին հաջորդում է Արայիկ Պարանյանը։ Նա Այրում համայնքի ժամանակավոր պաշտոնակատարն է, իսկ ցուցակի 3-րդ համարը «Նոյեմբերյան» ԲԿ-ի աշխատակազմի ղեկավար Հայկանուշ Բեգլարյանն է: Ընտրական ցուցակում առաջադրված թեկնածուները 33-ն են, բոլորը՝ «Քաղաքացիական պայմանագիր» կուսակցության անդամներ։

«Ապրելու երկիր» կուսակցության ընտրական ցուցակի առաջին համարը Կողբ համայնքի (Կողբ, Զորական) նախկին ղեկավարն է՝ Արսեն Աղաբաբյանը։ Կողբ համայնքի ղեկավարի ժամանակավոր պաշտոնակատար Սերյոժա Ավագյանը ընտրություններին ներգրավված է ՔՊ-ի ցուցակով։ Արսեն Աղաբաբյանն անկուսակցական է։ «Ապրելու երկիր» կուսակցության ընտրական ցուցակում առաջադրված 2-րդ համարի թեկնածուն Վանուշ Ամիրաղյանն է, նա Նոյեմբերյան քաղաքի քաղաքապետն է եղել 2008-2016թթ․-ին, 2016թ․-ի ընտրություններին մասնակցել է ՀՀԿ-ի ցուցակով։

Ընտրական ցուցակով 3-րդ համարը Անահիտ Փարսադանյանն է: Նա վերջերս ստեղծված «Բերդավան» հիմնադրամի համակարգողն է։ Ընտրական ցանկում ընդգրկված է 32 անձ, 8-ը՝ անկուսակցական։

Ընտրություններին մասնակցող 3-րդ կուսակցությունը «Հանուն հանրապետության ժողովրդավարության պաշտպանների դաշինք» կուսակցությունն է։ Ընտրական ցուցակը գլխավորում է անկուսակցական, անհատ ձեռներեց Մհեր Աղամյանը։ Երկրորդ տեղում անհատ ձեռներեց Քաջիկ Անանյանն է, իսկ 3-րդ համարը Բագրատաշեն համայնքի դպրոցի տնօրեն Լիանա Ալավերդյանն է։ Ընտրական ցուցակում 19 հոգի է ներառված, 7-ը ՝ անկուսակցական։

Ի՞նչ են հայտարարագրել թեկնածուները

Տավուշի մարզի թիվ 37 տարածքային ընտրական հանձնաժողովը «Հետքին» տրամադրել է ընտրություններին մասնակցող թեկնածուների գույքի և եկամուտների հայտարարագրերը։ 

ՔՊ-ի ցուցակը գլխավորող Կարեն Աբազյանի հայտարարագիրը

ՔՊ-ի ցուցակի առաջին համար Կարեն Աբազյանն իր անունով անշարժ գույք չունի, իսկ շարժական գույքերից ներկայացրել է Toyota 4Runner մակնիշի մեկ ավտոմեքենա, Vaz 2106 մակնիշի ավտոմեքենա և Gaz 53 մակնիշի ավտոմեքենա։ Թեկնածուն թանկարժեք գույք չի հայտարարագրել, որպես եկամուտ հայտարարագրել է 4 450 683 դրամ աշխատավարձ, հայտարարագիրը լրացնելու օրվա դրությամբ ունեցել է 2300 ԱՄՆ դոլար և 3.450 000 դրամ գումար։

«Ապրելու երկիր» կուսակցության ընտրական ցուցակը գլխավորող Արսեն Աղաբաբյանի հայտարարագիրը

Արսեն Աղաբաբյանը հայտարարագրել է Կողբ համայնքում գտնվող 2 հողատարածք՝ 01հա և 0,08 հա մակերեսով և որպես Կողբի համայնքապետ ստացած աշխատավարձը՝ 3.113.000 դրամ։ 

«Հանուն Հանրապետության» կուսակցության ցուցակը գլխավորող Մհեր Աղամյանի հայտարարագիրը

Թեկնածուն հայտարարագրել է համասեփականության կարգով Պտղավան համայնքում գտնվող առանձատուն, 3 մլն դրամ շահույթ, դրամական միջոցներ հայտարարագիրը լրացնելու օրվա դրությամբ՝ 1200 ԱՄՆ դոլար, 500 000 դրամ։

Ուսումնասիրել ենք նաեւ ընտրական ցուցակների 2-րդ և 3-րդ համարների հայտարարագրերը։ ՔՊ-ի ցուցակի 2-րդ համար Արայիկ Պարանյանը հայտարարագրել է 1 բնակելի տուն և 1 ավտոկայանատեղի Պտղավան համայնքում։ Որպես եկամուտ հայտարարագրել է 4 296․000 աշխատավարձ Այրումի համայնքապետարանից և 1.380.000 կենսաթոշակ՝ ոստիկանությունից։ Հայտարագիրը ներկայացնելու օրվա դրությամբ ունեցել է 300 000 դրամ։

Ցուցակի 3-րդ համարը Հայկանուշ Բեգլարյանն է։ Հայտարարագրում ներկայացրել է 6 անշարժ գույք՝ 5 բնակարան, որից 3-ը՝ Նոյեմբերյանում, մեկը՝ Երևանում, մյուսը՝ Ոսկեպարում, և 1 հողատարածք Ոսկեպարում։ Հայտարարագրել է 2 ավտոմեքենա՝ Lexus gx 470  2004 և Land-Rover 2007 մակնիշի։ «Թանկարժեք գույք» բաժնում Բեգլարյանը հայտարարագրել է 20 մլն դրամ ընդհանուր արժեքով ոսկյա և արծաթյա զարդեր։ Նա հայտարարագրել է նաև 2,4 մլն դրամ աշխատավարձ, ևս 2 մլն դրամ Հայկանուշ Բեգլարյան Ա/Ձ-ից ստացած եկամուտ։ Դրամական միջոցները հայտարարագիրը լրացնելու օրվա դրությամբ բաժնում ներկայացրել է 9 մլն դրամ, 1000 ԱՄՆ դոլար և 55 հազար ռուբլի։

«Ապրելու երկիր» կուսակցության ընտրական ցուցակի 2-րդ համար Վանուշ Ամիրաղյանը հայտարարագրել է 3 անշարժ գույք՝ առանձնատուն Նոյեմբերյանում, հողամասեր Նոյեմբերյանում և հասարակական նշանակության կառույց Նոյեմբերյանում։ Հայտարարագրում 2 մեքենա է՝ Lexus GX 470 2005թ․ և Մերսեդես C 1998թ․։ Եկամուտների բաժնում հայտարարագրված է 1 մլն 200 հազար դրամ վարձավճար։

Ցուցակի երրորդ համար Անահիտ Փասադանյանի հայտարարագրում որևէ բան լրացված չէ։

«Հանուն հանրապետության ժողովրդավարության պաշտպանների դաշինք»-ի ընտրական ցուցակի երկրորդ համար Քաջիկ Անանյանը հայտարարագրել է Նոյեմբերյան քաղաքում գտնվող առանձնատուն, երկու վարելահող եւ խաղողի մեկ այգի։ Հայտարարագրված է երկու ավտոմեքենա՝ 2002 թվականի արտադրության Nissan Pathfinder եւ 1996 թվականի արտադրության «Գազել» մակնիշի մեքենա։ Որպես ԱՁ հայտարարագրել է 3 մլն դրամ շահույթ եւ 2 մլն դրամ որպես այլ եկամուտ։ Հայտարարագիրը լրացնելու պահին ունեցել է 200 հազար դրամ եւ 600 ԱՄՆ դոլար դրամական եկամուտ։

Կուսակցության մյուս թեկնածուն՝ Լիանա Ալավերդյանը հայտարարագրել է համատեղ սեփականությամբ 1 առանձնատուն Բագրատաշեն համայնքում եւ 1,6 հա հողատարածք։ Որպես աշխատավարձ հայտարարագրել է 1.826.000 դրամ, ինչպես նաեւ՝ դրամական միջոցներ հայտարարագիրը լրացնելու օրվա դրությամբ՝ 650.000 դրամ եւ 200 ԱՄՆ դոլար։ Նա նաեւ բաժնետոմս ունի «Ակբա» բանկում։

Գլխավոր լուսանկարում՝ Կարեն Աբազյանը, Արսեն Աղաբաբյանը, Մհեր Աղամյանը