Ծաղկաձոր խոշորացված համայնքի 26/1 ընտրատեղամասում պարբերաբար կուտակումներ են լինում։ Ընտրողները հաճախ ներս էին մտնում խմբերով։ Հանձնաժողովի անդամ Վոլոդյա Մուրադյանը բնակիչներին խնդրում էր հերթով ներս մտնել։

Ընտրատեղամասը գտնվում է դպրոցի շենքում։ Սենյակից դուրս՝ միջանցքում հավաքված էին տարբեր մարդիկ, որոնք ընտրողներ չէին, նրանց թվում նաև վստահված անձինք կային։

Ընտրողներից մեկի՝ Տիգրան Հակոբյանի անունը թեև կար ընտրողների ցուցակում, բայց նա չէր կարողանում մասնակցել ընտրությանը։

«Եկել եմ ընկերոջս ընտրեմ, բայց չի լինում, անձնագիրս չի ճանաչում»,-նշեց նա։

Երբ զրուցում էինք, մեզ մոտեցավ «Քաղաքացիական պայմանագիր» կուսակցության վստահված անձ Գոռ Առաքելյանը և նշեց, որ մեր հարցերով խանգարում ենք, ու ընտրողը լարվում է, բայց մենք փորձում էինք տեղեկանալ, թե ինչումն է խնդիրը, որ քաղաքացին չի կարողանում ընտրել։

Գոռ Առաքելյանը

Խնդրեցինք Գոռ Առաքելյանին չմիջամտել, ինչին ի պատասխան վերջինս ասաց․ «Ախպերս ա, խառնվում եմ, ի՞նչ կա»։

Այնուհետև նկատեցինք, որ «Քաղաքացիական պայմանագիր» կուսակցությունից երկու վստահված անձ է ներսում՝ Գոռ Առաքելյանն ու Վահագն Խաչատրյանը։

Հարցին, թե ինչու՞ են նույն ուժից երկու հոգի ներսում, Գոռ Առաքելյանը պատասխանեց, որ քիչ առաջ է ներս մտել։

Վահագն Խաչատրյանը (կենտրոնում)

Քարտուղարից տեղեկացանք, որ վերջինս նրան գրանցումից հանել էր, բայց Գոռ Առաքելյանը շարունակում էր ընտրատեղամասում մնալ։ Մեր նկատառումից հետո նա դուրս եկավ ընտրատեղամասից դեպի միջանցք։

Ծաղկաձոր քաղաքի միակ՝ 26/1 ընտրատեղամասում կա գրանցված 1124 ընտրող։

Հիշեցնենք, որ Ծաղկաձոր խոշորացված համայնքում ընտրապայքարին մասնակցում է երկու քաղաքական ուժ՝ «Մեր համայնքը» դաշինքը և «Քաղաքացիական պայմանագիր» կուսակցությունը։