Ադրբեջանի նախագահ Իլհամ Ալիևը Հայաստանից պահանջում է ասել, այսպես կոչված, «Զանգեզուրի միջանցք»-ի բացման ժամկետները։ Այդ մասին Ալիևը հայտարարել է Ղուբայի շրջան այցի ժամանակ, գրում է Interfax-ը։ «Ես ասում էի, մեզ ասեք ժամկետներ, թե երբ կազատեն մեր հողերը և այդ ժամանակ մենք պատրաստ էինք կանգ առնել։ Այսօր ես ասում եմ նույն խոսքերը։ Ասեք ժամկետներ, թե երբ կբացվի Զանգեզուրի միջանցքը, և այդ դեպքում որևէ խնդիր չի լինի»,- ասել է Ալիևը։

Ալիևի խոսքերով՝ ինքը հույս ունի, որ հարցը կլուծվի կառուցողական ճանապարհով։ «Մենք հասել ենք նրան, ինչ ուզում ենք, հասնում ենք և կհասնենք։ Լավ կլինի, եթե այդ հարցը լուծվի կառուցողական ճանապարհով, բանակցությունների և փոխըմբռնման տարբերակով»,- նշել է Ալիևը։

Նա դարձյալ խոսել է այն մասին, որ պատերազմի ընթացքում եղել են ուժեր, որոնք Ադրբեջանին փորձել են կանգնեցնել։ Իր խոսքում Ալիևը դարձյալ սպառնացել է Հայաստանին՝ հայտարարելով, որ եթե լինեն ռևանշիստական գործողություններ, հարցն անմիջապես կլուծվի։ «Քանի դեռ ուշ չէ, նրանք պետք է ընդունեն մեր պայմաններն ու վերջ դնեն ճանապարհների ու հաղորդակցությւնների նկատմամբ առկա ոչ անկեղծ մոտեցմանը»,- եզրափակել է նա։

Պատերազմի ավարտից անցել է մեկ տարուց ավելի, սակայն Ադրբեջանը շարունակում է սպառնալ Հայաստանի անվտանգությանն ու տարածքային ամբողջականությանը։ Այս տարվա մայիսի 12-ից սկսած ադրբեջանական ուժերն ապօրինաբար գտնվում են ՀՀ սուվերեն տարածքում։ Նոյեմբերի 16-ին հայ-արդբեջանական շփման գծի արևելյան հատվածում լարվածությունը վեր էր ածվել ակտիվ մարտական գործողությունների, որի արդյունքում կողմերը գործի էին դրել զրահատեխնիկա և հրետանի։

Անվտանգության խորհրդի քարտուղար Արմեն Գրիգորյանը հայտարարել էր, որ Երևանը կդիմի Մոսկվային՝ օգնություն ստանալու համար։ «Քանի որ հարձակումը եղել է Հայաստանի սուվերեն տարածքի վրա, ապա մենք դիմում ենք Ռուսաստանին՝ Հայաստանի և Ռուսաստանի միջև 1997 թվականի պայմանագրի շրջանակում Հայաստանի տարածքային ամբողջականությունը պաշտպանելու կոչով և համաձայնագրի շրջանակում փոխադարձ պարտականություններն իրագործելու տրամաբանության շրջանակներում»,- նշել էր Անվտանգության խորհրդի քարտուղար Արմեն Գրիգորյանը։ 

Լուսանկարը՝ Ադրբեջանի նախագահի մամուլի ծառայության