Արցախյան 44-օրյա պատերազմում զոհված, «Մարտական խաչ» 1-ին աստիճանի շքանշանի ասպետ Գևորգ Արշակյանի անվան մրցանակաբաշխության 3 անվանակարգից մեկում մրցանակ է ստացել «Հետք»-ը՝ պատերազմի վերաբերյալ հետաքննությունների ու մարդու իրավունքների խնդիրները հետևողականորեն բարձրաձայնելու համար։

Մրցանակաբաշխությունը կազմակերպվել էր Գևորգ Արշակյանի մոր՝ Նաիրա Հովսեփյանի, Մարդու իրավունքների պաշտպան Արման Թաթոյանի, «Իրավական ուղի» ՀԿ իրավապաշտպան Սիրանուշ Սահակյանի ջանքերով։

Նշենք, որ «Հետքի» թիմը պատերազմի առաջին օրից Արցախում էր, եղել է առաջնագծի տարբեր հատվածներում։ Ռազմական գործողությունների ավարտից հետո խմբագրությունը սկսել է հետաքննել պատերազմում Հայաստանի պարտության պատճառները, թե ինչպես եւ ինչու Արցախի բնակավայրերը հայտնվեցին ադրբեջանական վերահսկողության տակ, ինչու ձախողվեց պաշտպանությունը։

Մարդու իրավունքների պաշտպան Արման Թաթոյանն իր ելույթում նշեց, որ «Հետք»-ի հետաքննություններն այնքան խորքային են, որ հաճախ դրանց վերաբերյալ մասնագիտական վերլուծություններ անելու կարիք չի լինում, քանի որ դրանք արդեն կան ու օգտագործվում են միջազգային փաստաթղթերում ու զեկույցներում։ «Ես պետք է հպարտությամբ ասեմ, որ այնքան բարձր է այդ լրատվամիջոցի դերը, որ մենք բաց ճակատով կարող ենք այդ տեղեկությունը օգտագործել և գիտենք, որ իրականության աղավաղում տեղի չի ունենում»,- նշեց նա։

Մյուս անվանակարգերում մրցանակների են արժանացել միջազգային իրավունքի մասնագետ, փաստաբան Լևոն Գևորգյանը, բժիշկներ Հասմիկ Դավթյանը, Լուսինե Պողոսյանը, Գոհար Բաղդասարյանը, Արմեն Հարությունյանը։