«Քաղաքացիական պայմանագիր» խմբակցության պատգամավորներ Վիլեն Գաբրիելյանը, Քրիստինեն Պողոսյանը, «Հանրապետություն» կուսակցության ղեկավար Արամ Սարգսյանը անձնական երաշխավորություն են տվել՝ Պաշտպանության նախկին նախարար Դավիթ Տոնոյանի համար: Վերջինիս պաշտպան Սերգեյ Հովհաննիսյանը «Հետք»-ի հետ զրույցում ասաց, որ Տոնոյանի խափանման միջոցի գործով դատական նիստն այսօր ընդմիջվել է և շարունակվելու է վաղը՝ հունվարի 21-ին:

Նշենք, որ Վիլեն Գաբրիելյանն ու Քրիստինե Պողոսյանը իրենց աջակցությունը Պաշտպանության նախկին նախարարին ցույց են տվել նաև ամիսներ առաջ, երբ Տոնոյանին ձերբակալել էին: Գաբրիելյանն ու Պողոսյանը, մասնավորապես, Երևանի ընդհանուր իրավասության դատարանի Կենտրոնի նստավայրի բակում էին, երբ դատարանը քննում էր Տոնոյանին կալանավորելու հարցը:

Նշենք, որ այսօրվա դատական նիստի ընթացքում պաշտպանական կողմը, բացի դատավորին ինքնաբացարկի միջնորդություն ներկայացնելուց, բացարկի միջնորդություն է ներկայացրել նաև դատախազին, սակայն այս միջնորդությունը ևս մերժվել է:

Հիշեցնենք, որ արդեն երկու օր է՝ դատարանը, նախագահությամբ դատավոր Մանվել Շահվերդյանի, քննում է ՊՆ-ից խոշոր չափի հափշտակություն կատարելու դեպքի առթիվ գործով կալանքի տակ գտնվող մեղադրյալների  խափանման միջոցի հիմնավորվածության հարցը:

Ըստ գործի վերաբերյալ Դատախազության հայտնած տեղեկության՝  ԶՈւ և ՊՆ- ի բարձրաստիճան պաշտոնատար անձինք, չարաշահելով իրենց պաշտոնեական դիրքը, «Մոսթոն Ինժիներինգ» ընկերության սեփականատիրոջ հետ նախնական համաձայնությամբ, «Նեյտրոն ԳԱՄ» և «Բագավան» ՓԲ ընկերությունների մասնավորեցումից ընկերության կողմից Պաշտպանության նախարարության հանդեպ ունեցած պարտավորությունը մարելու նպատակով, 2018թ. ընկերությունից ընդունել՝ ձեռք են բերել 4232 հատ ժամկետանց, տեխնիկական պահանջներին չհամապատասխանելու պատճառաբանությամբ նախկինում չընդունված և ՊՆ-ում պահեստավորված ռազմամթերքը։ Պարզվել է նաև, որ վերը նշված անձինք ռազմամթերքի ձեռքբերման պայմանագրի կնքման համար առկա խոչընդոտները վերացնելու և իրենց գործողություններին օրինական տեսք տալու համար պայմանագրի մաս կազմող տեխնիկական բնութագիրը համապատասխանեցրել են փաստացի ՊՆ-ում ի պահ հանձնված ապրանքի տվյալ տեսակին՝ դրանում նշելով ռազմամթերքը գործարանային արկղերով ՊՆ N զորամասի կենտրոնական պահեստ մատակարարելու վերաբերյալ իրականությանը չհամապատասխանող տվյալներ։ Ընդ որում՝ նշված ռազմաթերքը ձեռք է բերվել նույն խմբաքանակից ռազմամթերքի նախկինում ձեռքբերման արժեքից գրեթե կրկնակի թանկ գնով՝ կատարելով առանձնապես խոշոր չափերով՝ 2,277,323,840 դրամին համարժեք, 4.655.200 դոլար գումարի հափշտակություն։

Ըստ մեղադրանքի` Դավիթ Տոնոյանի՝ Քրեական օրենսգրքի 179-րդ հոդվածի 3-րդ մասի 1-ին կետով, Արտակ  Դավթյանի՝ ՀՀ քրեական օրենսգրքի 375-րդ հոդվածի 3-րդ մասով, Ստեփան Գալստյանի՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Ավետիկ Մուրադյանի՝ Քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Վլադիմիր Բաբայանի՝ Քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Արտյոմ Համբարյանի՝ Քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Դավիթ Գալստյանի՝ Քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով:

Մեղադրյալներն իրենց առաջադրված մեղադրանքը չեն ընդունում:

Նրանց  պաշտպանները բազմիցս հայտարարել են, որ գործում առկա տվյալները հերքում են իրենց պաշտպանյալներին առաջադրված մեղադրանքները, նրանց պահանջել են  հրթիռների որակի ստուգման համար նշանակել փորձաքննություն, ինչը չի արվել:

Լուսանկարում՝ Վիլեն Գաբրիելյանը