Տեսանյութեր
Լուսանկարներ
Բայդենն ու Պուտինը հավանություն են տվել Ուկրաինայի վերաբերյալ գագաթնաժողով անցկացնելու Մակրոնի առաջարկին
Ֆրանսիայի նախագահ Էմանուել Մակրոնը ԱՄՆ նախագահ Ջո Բայդենի և Ռուսաստանի նախագահ Վլադիմիր Պուտինի հետ հեռախոսազրույցների ժամանակ առաջարկել է անցկացնել Ուկրաինայի վերաբերյալ գագաթնաժողով։ Ելիսեյան պալատի փոխանցմամբ՝ երկու կողմերն էլ համաձայնվել են։
«Նա (խմբ. Մակրոնը) առաջարկել է գագաթնաժողով անցկացնել նախագահ Բայդենի և նախագահ Պուտինի միջև, իսկ այնուհետ շահագրգիռ բոլոր կողմերի, որպեսզի քննարկվի Եվրոպայում անվտանգության և ռազմավարական կայունության հարցերը»,- հայտնում է Ֆրանսիայի նախագահի մամուլի ծառայությունը։ Ելիսեյան պալատը հավելել է, որ առաջիկա գագաթնաժողովի օրակարգը կպատրաստեն Էնթոնի Բլինքենը և Սերգեյ Լավրովը։
Սպիտակ տնից էլ հայտնել են, որ Բայդենը համաձայնվել է Պուտինի հետ անցկացնել գագաթնաժողով այն բանից հետո, երբ փետրվարի 24-ին կհանդիպեն ԱՄՆ պետքարտուղար Էնթոնի Բլինքենը և ՌԴ ԱԳ նախարար Սերգեյ Լավրովը։
«Նախագահ Բայդենը տվել է սկզբունքային համաձայնություն նախագահ Պուտինի հետ հանդիպման այդ շփումներից հետո, իհարկե, եթե չլինի ներխուժում»,- հայտարարել է Սպիտակ տան ներկայացուցիչ Ջեն Փսաքին։
Կրեմլը դեռևս պաշտոնապես չի մեկնաբանել Բայդենի և Պուտինի մասնակցությամբ առաջիկա գագաթնաժողովը։ Փետրվարի 20-ին Ֆրանսիայի նախագահ Էմանուել Մակրոնի և ՌԴ նախագահ Վլադիմիր Պուտինի հեռախոսազրույցի վերաբերյալ տարածված մամուլի հաղորդագրության մեջ, Կրեմլը չէր հիշատակել գագաթնաժողովի անցկացման փաստը։
Ռուսաստանը 2021 թվականի աշնանից զորքեր է տեղակայում Ուկրաինայի հետ սահմանի մոտ՝ դա բացատրելով զորավարժությունների անցկացմամբ։ ԱՄՆ գնահատմամբ՝ Ռուսաստանը սահմանին տեղակայել է ավելի քան 150 000 զինծառայող։ Արևմուտքի երկրները կարծում են, որ Ռուսաստանը կարող է առաջիկա օրերին սկսել ներխուժումն Ուկրաինա։ Կրեմլը հերքում է՝ պնդելով, որ չի պատրաստվում հարձակվել որևէ երկրի վրա։
Վերջին օրերին Դոնբասում իրավիճակը խիստ լարված է։ Փետրվարի 18-ին Լուգանսկի և Դոնեցկի ինքնահռչակ հանրապետությունների ղեկավարները հայտարարել էին դեպի Ռուսաստան Դոնբասի բնակչության զանգվածային տարհանման մասին։ Այդ պատճառով Ռուսաստանի մի քանի մարզերում և երկրամասերում հայտարարվել է արտակարգ իրավիճակ։
Լուսանկարները՝ AP Photo/Patrick Semansky; Alexei Nikolsky, Sputnik, Kremlin Pool Photo via AP
Մեկնաբանել