Կրեմլը ողջունում է խաղաղության բանակցություններ սկսելու՝ Երևանի և Բաքվի որոշումը
Կրեմլը դրական է գնահատում Հայաստանի և Ադրբեջանի իշխանությունների որոշումը՝ խաղաղության բանակցությունների գործընթաց սկսելու վերաբերյալ։ Այդ մասին հինգշաբթի՝ ապրիլի 7-ին լրագրողների հետ ճեպազրույցում հայտարարել է ՌԴ նախագահի մամուլի քարտուղար Դմիտրի Պեսկովը։
Բրյուսելում նախօրեին կայացած հայ-ադրբեջանական բանակցությունների առնչությամբ նա ասել է. «Պարզ է, որ այդ գործընթացը շարունակական է, սակայն այդպիսի փաստաթղթի հանգելու առաջխաղացումն ինքնին դրական և ողջունելի փաստ է»։
Հիշեցնենք, որ նախօրեին Բրյուսելում Եվրոպական խորհրդի նախագահ Շառլ Միշելի միջնորդությամբ կայացել էր Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։ 4 ժամից ավելի տեւած հանդիպման արդյունքներով Փաշինյանն ու Ալիևն արտաքին գործերի նախարարներին հանձնարարել են սկսել խաղաղության պայմանագրի շուրջ բանակցությունների նախապատրաստական աշխատանքները։
Լուսանկարը՝ AFP-ի
Մեկնաբանել