2021-ին Հայաստանի միջազգային պահուստները 23.5%-ով աճել են
2021 թվականին Հայաստանի միջազգային պահուստներն աճել են շուրջ 614 մլն ԱՄՆ դոլարով կամ 23.5%-ով՝ տարեվերջին կազմել շուրջ 3 մլրդ 230 մլն ԱՄՆ դոլար: Այս մասին տեղեկանում ենք Կենտրոնական բանկի (ՀՀ ԿԲ) տարեկան հաշվետվությունից։
2010 թվականից սկսած՝ ըստ տարեվերջյան տվյալների՝ միջազգային պահուստների ամենաբարձր մակարդակը գրանցվել է 2021 թվականին, ամենացածր մակարդակը՝ 2014-ին։
Ինչպես մեկնաբանում են գլխավոր դրամատնից, 2021 թվականին միջազգային պահուստների փոփոխության վրա հիմնականում ազդել են պետական պարտքի ներգրավումը, պարտքի գծով սպասարկումները և ներքին շուկայում արտարժույթի վաճառքը։
Մասնավորապես, պետական պարտքի՝ արտաքին վարկերի ու փոխառությունների գծով ստացվել է շուրջ 1 մլրդ դոլար։
Ինչպես ավելի վաղ գրել ենք, դա մեծապես պայմանավորված է Կառավարության կողմից եվրապարտատոմսերի թողարկմամբ։ Հայաստանը 2021 թվականի բյուջեի դեֆիցիտը լրացնելու համար հունվարի 26-ին 750 մլն դոլարի եվրապարտատոմս է տեղաբաշխել միջազգային շուկայում: Ավելի պարզ ասած՝ արտաքին աշխարհից 750 մլն դոլարի նոր պետական պարտք է ներգրավել, որը «տեղ է գտել» միջազգային պահուստներում։
- Հայաստանի միջազգային պահուստները փետրվարին կտրուկ աճել են ներգրավված պետական պարտքի հաշվին
- 2021-ին Հայաստանի պետական պարտքը 15.8%-ով աճել է՝ հատելով 9 մլրդ դոլարի շեմը
Միևնույն ժամանակ, նույն տարում արտաքին պետական պարտքը սպասարկելու համար պահուստներից ծախսվել է շուրջ 460 մլն դոլար։
Իսկ ներքին շուկայում արտարժույթի զուտ վաճառքը կազմել է 134 մլն դոլար։
378 մլն դոլար էլ կազմել են ֆինանսական կազմակերպությունների և բանկերի թղթակցային հաշիվների մնացորդները։
Մեկնաբանել