ԱՄՆ նախագահ Ջո Բայդենը հայտարարել է, որ Միացյալ Նահանգները Ուկրաինայի իշխանություններին զգուշացնում էր ռուսական նախապատրաստվող ներխուժման մասին, սակայն նրանք ականջալուր չեղան դրանց։ Այդ մասին հայտնում է The Guardian-ը։

«Նման բան տեղի չէր ունեցել Երկրորդ համաշխարհային պատերազմից ի վեր։ Ես գիտեմ, որ շատ մարդիկ մտածում էին, որ ես, հավանաբար, չափազանցնում եմ»,- ասել է Բայդենը Լոս Անջելեսում անցկացվող դրամահավաքի ժամանակ։

«Բայց ես գիտեի, որ մենք տվյալներ ունենք, որոնք հաստատում են, որ (Պուտինը) սահմանից պատրաստվում է մտնել այդ երկիր։ Որևէ կասկած չկար»,- հայտարարել է ԱՄՆ նախագահը՝ հավելելով, որ «Զելենսկին չէր ուզում դա լսել»։

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը թվիթերյան իր միկրոբլոգում այսպես է մեկնաբանել Բայդենի հայտարարությունը։ «Ուկրաինան պատերազմին պատրաստվում էր նախորդ տարվանից։ Նախատեսվող ներխուժման մասին տեղեկատվությունը փոխանցում էին ոչ միայն արևմտյան հետախուզությունը, այլև մեր: ԱՆհեթեթ է ինչ-որ բանում մեղադրել մի պետության, որն ավելի քան 100 օր լայնամասշտաբ պատերազմում արդյունավետորեն կռվում է առավել ռեսուրսներ ունեցող հակառակորդի դեմ, երբ գլխավոր երկրները չեն կարողացել կանգնեցնել ՌԴ միլիտարիստական ախորժակը՝ դրա մասին լավ իմանալով»,- գրել է Պոդոլյակը։

When others gave us three days, 🇺🇦 intelligence said: we will endure. What other countries have done to stop it, knowing Moscow's plans — a question. If we had started getting heavy weapons in January, the situation could have been different. 2/2

— Михайло Подоляк (@Podolyak_M) June 11, 2022

Ռուսաստանցի զինվորականները դեռ նախորդ տարվա աշնանից սկսել էին զանգվածային զորավարժություններ անցկացնել Ուկրաինայի հետ սահմաններին, իսկ զորքերի կուտակումն սկսվել էր դեռ նախորդ տարվա գարնանից։ Արևմտյան հետախուզությունները դրանում տեսնում էին ներխուժման պատրաստման նախանշան։ Ռուսական իշխանությունները հերքում էին այդ ամենը՝ պնդելով, որ խոսքը գնում է սովորական զորավարժությունների մասին։

Իլյուստրացիան՝ The Financial Times-ի