Քաթարում ընթացող ֆուտբոլի աշխարհի առաջնությունում աշխարհի գործող չեմպիոն Ֆրանսիայի հավաքականն իր մեկնարկային խաղում 4։1 հաշվով գերվստահ հաղթանակ տարավ Ավստրալիայի ընտրանու նկատմամբ։

Հանդիպման հաշիվը բացեցին ավստրալացիները, 9-րդ րոպեին աչքի ընկավ Կրեյգ Գուդվինը։ 27-րդ րոպեին Ֆրանսիայի հավաքականի կիսապաշտպան Ադրիեն Ռաբյոն հավասարեցրեց հաշիվը, իսկ 5 րոպե անց Օլիվյե Ժիրուն արդեն առաջ մղեց ֆրանսիացիներին։ Սա առաջին կեսի վերջին գոլն էր։

Երկրորդ խաղակեսի միջնամասում Ֆրանսիայի ազգային ընտրանին մեծացրեց իր առավելությունը, 68-րդ րոպեին գոլի հեղինակ դարձավ Կիլիան Մբապեն։ 71-րդ րոպեին կրկին Օլիվյե Ժիրուն հաշիվը խոշոր դարձրեց՝ դնելով հանդիպման վերջակետը։ Հարկ է նշել, որ սա Ֆրանսիայի հավաքականի կազմում Ժիրուի 51-րդ գոլն էր, և նա այս ցուցանիշով հավասարվեց ազգային թիմի բոլոր ժամանակների լավագույն ռմբարկու Թիերի Անրիին։

Նոյեմբերի 22-ին՝ ավելի վաղ D խմբի մյուս խաղում Դանիայի և Թունիսի հավաքականները գոլազուրկ ոչ-ոքի են խաղացել։