Ֆուտբոլի աշխարհի գավաթի խաղարկությունում այսօր իր առաջին խաղն անցկացրեց մրցաշարի ֆավորիտներից Պորտուգալիայի հավաքականը, որը կարողացավ 3։2 հաշվով պարտության մատնել Գանայի ընտրանուն։

Ամբողջ հանդիպման ընթացքում Պորտուգալիան տարածքային և խաղային առավելություն ուներ, սակայն խաղի հաշիվը բացվեց միայն 65-րդ րոպեին․ 11-մետրանոց հարվածը դիպուկ իրացրեց պորտուգալացիների ավագ Կրիշտիանու Ռոնալդուն։ Այս գոլի շնորհիվ Ռոնալդուն դարձավ պատմության առաջին խաղացողը, որը գոլ է խփել աշխարհի 5 տարբեր առաջնություններում։ 

73-րդ րոպեին Գանայի հավաքականի ֆուտբոլիստները հավասարեցրին հաշիվը, աչքի ընկավ Անդրե Այուն, սակայն գանացիների ուրախությունը կարճ տևեց, քանի որ 5 րոպե անց Ժոաո Ֆելիքսը կրկին առաջ մղեց Պորտուգալիային։ 80-րդ րոպեին էլ Ռաֆայել Լեաուն ամրապնդեց պորտուգալացիների առավելությունը՝ 3։1, սակայն գանացիները չհանձնվեցին և 89-րդ րոպեին կրճատեցին հաշվի տարբերությունը, աչքի ընկավ Օսման Բուկարին։ Այնուամենայնիվ, Գանայի հավաքականին ավելին անել չհաջողվեց և խաղն ավարտվեց Պորտուգալիայի հաղթանակով։

Պորտուգալիայի և Գանայի ազգային ընտրանիների հետ նույն G խմբում ընդգրկված Ուրուգվայի և Հվ․ Կորեայի հավաքականները ավելի վաղ գոլազուրկ ոչ-ոքի էին խաղացել։