Հայաստանի հետ հարաբերությունների կարգավորման գործընթացն սկսվել է տարածաշրջանային կայունության ապահովման համար։ Այդ մասին, Cumhuriyet-ի փոխանցմամբ, Թուրքիայի ազգային մեծ ժողովում հայտարարել է այդ երկրի փոխնախագահ Ֆուաթ Օքթայը։

Նրա խոսքով՝ Թուրքիան աջակցում է նաև Ադրբեջանի և Հայաստանի միջև հարաբերությունների կարգավորման գործընթացին։

«Մենք արել և անում ենք ամեն ինչ, ինչը բխում էր մեր երկրի և ժողովրդի շահերից։ Մենք ամենամեծ օգնությունն ենք ցուցաբերել Ադրբեջանին։ Այնուհետ մենք սկսեցինք աջակցել Հայաստանի հետ կարգավորման գործընթացին տարածաշրջանում կայունության համար»,- ասել է Օքթայը։

Հայաստանն ու Թուրքիան դեռ նախորդ տարի էին նշանակել հարաբերությունների կարգավորման հատուկ բանագնացներ։ Հայկական կողմը ներկայացնում է ԱԺ փոխխոսնակ Ռուբեն Ռուբինյանը, իսկ թուրքականը՝ ԱՄՆ-ում Թուրքիայի նախկին դեսպան Սերդար Քըլըչը։ Մինչ այժմ այս ձևաչափով 4 հանդիպում է եղել, որից մեկը Մոսկվայում, իսկ մյուս երեքը՝ Վիեննայում։

Ավելի վաղ, Թուրքիայի ԱԳ նախարար Մևլյութ Չավուշօղլուն ևս այն կարծիքն էր հայտնել, որ երկրի ներսում Հայաստանի կառավարության վրա ճնշումները գլխավոր խոչընդոտն են Անկարայի և Երևանի հարաբերությունների կարգավորման գործընթացում։ Նրա խոսքով՝ պաշտոնական Անկարան կողմ է Երևանի հետ հարաբերությունների կարգավորմանը և պատրաստ է աստիճանաբար առաջ տանել այդ գործընթացը։

Չնայած ընդհանուր սահմանին՝ Հայաստանի և Թուրքիայի միջև չկան դիվանագիտական հարաբերություններ։ 1993 թվականից Թուրքիան փակել է Հայաստանի հետ սահմանը։ 2009 թվականին Ցյուրիխում երկու երկրի արտաքին գործերի նախարարները ստորագրել էին «Հայաստանի Հանրապետության և Թուրքիայի Հանրապետության միջև դիվանագիտական հարաբերություններ հաստատելու մասին» և «Հայաստանի Հանրապետության և Թուրքիայի Հանրապետության միջև հարաբերությունների զարգացման մասին» արձանագրությունները, սակայն այդ փաստաթղթերը չէին վավերացվել երկու կողմի խորհրդարանների կողմից։ 2018 թվականի մարտի 1-ին Հայաստանը հայտարարել էր հայ-թուրքական արձանագրությունների կնքման ընթացակարգի դադարեցման մասին։

Լուսանկարը՝ Anadolu գործակալության