Ներքին գործերի նախարարության կազմավորումից հետո արդեն նախկին ոստիկանապետ Վահե Ղազարյանը հանրապետության նախագահի հրամանագրով՝ նշանակվեց ներքին գործերի նախարար, իսկ ոստիկանության պետի առաջին տեղակալ Արամ Հովհաննիսյանը վարչապետի որոշմամբ՝ 2023թ․ հունվարի 9-ին նշանակվեց ոստիկանության պետ-ներքին գործերի նախարարի տեղակալ։

Այսօր կներկայացնենք, թե ինչ գույք և եկամուտներ է հայտարարագրել նորանշանակ ոստիկանապետ Արամ Հովհաննիսյանը՝ 2021 թվականի տարեկան հայտարարագրում։

Հովհաննիսյանը հայտարարագրել է 6 միավոր անշարժ գույք Արարատի մարզում (նա ծնունդով Արտաշատ քաղաքից է)․

• անհատական բնակելի տուն Արտաշատում, որը որպես ժառանգություն ստացել է 2011 թվականին,
• բազմամյա տնկիների այգի Արտաշատում, որը կրկին ժառանգություն է ստացել 2016 թվականին,
• այգետնակ՝ ամառանոցային շինություն Լանջազատ գյուղում, որը նվիրատվություն է ստացել 2015 թվականին,
• այգետնակ Լանջազատում, որը գնել է 2011 թվականին,
• կրկին այգետնակ՝ Լանջազատում՝ գնված 2011 թվականին,
• հասարակական նշանակության շինություն Արտաշատում, որը Արամ Հովհաննիսյանին է պատկանում 2004 թվականից, սակայն հայտարարագրում նշված չէ այդ անշարժ գույքի ձեռքբերման եղանակը։

2021 թվականի ընթացքում Արամ Հովհաննիսյանը 4,7 միլիոն դրամ փոխառություն է հանձնել «Սկայ Բլինդինգ» ՍՊԸ-ին՝ 12,87% տոկոսադրույքով։ Ի դեպ «Սկայ Բիլդինգ» ՍՊԸ-ի գործունեությունը 2022 թվականի մարտին միացման եղանակով դադարեցվել է։ Ընկերությունը միավորվել է հանքարդյունաբերության և բնակելի շենքերի շինարարության ոլորտներում հայտնի «ՄԼ Մայնինգ» ընկերությանը, որը պատկանում է Հատուկ քննչական ծառայության նախկին գլխավոր քարտուղար Դավիթ Սուքիասյանին։

Որպես դրամական միջոց՝ Արամ Հովհաննիսյանը հայտարարագրել է 16 միլիոն դրամ կանխիկ գումար։ Իսկ որպես եկամուտ՝ 15 միլիոն դրամ աշխատավարձ և 42 միլիոն դրամ փոխառություն «Արդշինբանկից»՝ եկամտահարկի վերադարձով բնակարանի գնման նպատակով։

Ոստիկանապետի կնոջ և որդիների հայտարարագրերը

Արամ Հովհաննիսյանի հետ համատեղ բնակվում են նաև կինն ու երեք որդիները։ Կինը՝ Լիլիթ Թովմասյանը, հայտարարագրել է Mazda մակնիշի ավտոմեքենա՝ գնված 2020 թվականին, և այն նույն 42 միլիոն դրամ հիփոթեքը, որը նշված է նաև որդիների հայտարարագրերում, այսինքն՝ ընտանիքի անդամները դարձել են համավարկառու։ Այլ գույք և դրամական միջոցներ Լիլիթ Թովմասյանը չի հայտարարագրել։

Արամ Հովհաննիսյանի ավագ որդին՝ Կառլեն Հովհաննիսյանը, նույնպես աշխատում է ոստիկանությունում։ Այդ մասին պարզ է դառնում նրա հայտարարագրից, որտեղ նա որպես եկամուտ՝ նշել է մոտ 5 միլիոն դրամ աշխատանքի վարձատրություն ոստիկանությունից։

Կառլեն Հովհաննիսյանը հայտարարագրել է նաև մեկ հողամաս Կոտայքի մազի Մեղրաձոր գյուղում։ Ոստիկանապետի ավագ որդին որպես տրանսպորտային միջոց՝ հայտարարագրել է BMW և Mercedes Benz մակնիշի մեքենաներ և IZH մակնիշի բեռնատար ավտոմեքենա։ 2021-ի ընթացքում Կառլեն Հովհաննիսյանը BMW-ն և Mercedes Benz-ը վաճառել է․ առաջինը՝ 700 հազար դրամով, երկրորդը՝ 5 միլիոն դրամով։ Կառլեն Հովհաննիսյանը հայտարարագրել է նաև 2,5 միլիոն դրամ կանխիկ գումար, ինչպես նաև 1,7 միլիոն դրամ վարկ՝ «Հայբիզնեսբանկից»։

Արամ Հովհաննիսյանի միջնեկ որդին՝ Հրաչյա Հովհաննիսյանը, հայտարարագրել է երեք միավոր անշարժ գույք՝ հողամաս և հասարակական նշանակության շինություն Երևանի Շենգավիթ վարչական շրջանում և միանձնյա սեփականության իրավունքով իրեն պատկանող հողամաս Կոտայքի մարզի Մեղրաձոր գյուղում։ Հրաչյա Հովհաննիսյանը հայտարարագրել է BMW մակնիշի ավտոմեքենա՝ գնված 2020 թվականին։ Որպես դրամական միջոց նա հայտարարագրել է 1 միլիոն դրամ կանխիկ գումար, իսկ որպես եկամուտ՝ վարձակալության դիմաց ստացված 1,2 մլն դրամ, ձեռնարկատիրական գործունեությունից ստացված 3 մլն դրամ և երկու վարկ «Հայէկոնոմբանկից» 1 մլն և 8 մլն դրամի չափով։

Ընտանիքի կրտսեր որդին՝ Էդգար Հովհաննիսյանը, 2021 թվականի ընթացքում հայտարարագրել է 300 հազար դրամ կանխիկ գումար, ձեռնարկատիրական գործունեությունից ստացված եկամուտ՝ 2,5 մլն դրամ, և 3 վարկ «Կոնվերսբանկից» 708 հազար, 1,3 մլն և 476 հազար դրամի չափով։

Առաջիկայում կհրապարակենք Ներքին գործերի նախարարության ղեկավար կազմի այլ ներկայացուցիչների գույքի և եկամուտների հայտարարագրերի մասին հոդվածներ։

Հիշեցնենք, որ նախօրեին անդրադարձել էինք Փրկարար ծառայության նորաննշանակ տնօրեն, ներքին գործերի նախարարի տեղակալ Կամո Ցուցուլյանի հայտարարագրին։ Պարզել էինք, որ Ցուցուլյանը թաքցրել է մասնավոր ընկերությունում իրեն պատկանող 67% բաժնեմասը։