HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Հայկ Մակիյան

Շրջափակված Արցախում. Ռոբերտ Մելքումյանը շարունակում է ստեղծագործել

 

2022-ի դեկտեմբերի 30-ին զրուցել էինք Ստեփանակերտում ապրող էլեկտրակիթառահար Ռոբերտ Մելքումյանի հետ։ Ռոբերտը Երևանի պետական կոնսերվատորիան ավարտելուց հետո վերադարձել է Արցախ, աշխատում է Արցախի պետական ջազ նվագախմբում որպես կիթառահար, նաև գրում է երաժշտություն։ Ուսումը շարունակելու, իր մասնագիտության մեջ խորանալու նպատակով Ռոբերտը Արցախի շրջափակումից առաջ առցանց մի քանի քննություններ էր հանձնել։ Շրջափակման ընթացքում իմացել է, որ ընդունվել է  Հարավային Ուելսի համալսարան (University of south Wales), Դանիայի թագավորական երաժշտական ակադեմիա(The Royal Academy of Music ) և Լոնդոնի ժամանակակից երաժշտության փերֆորմանսի ինստիտուտ (The Institute of Contemporary Music Performance): Այժմ շրջափակման մեջ գտնվող Արցախում Ռոբերտը մնացած արցախցիների նման զրկված է ազատ տեղաշարժվելու, կրթությունը շարունակելու իրավունքից։   

Շրջափակման մեջ Ռոբերտը շարունակում է նվագել, գրել երաժշտություն և  ձայնագրել։

Այս ընթացքում Ռոբերտի էլեկտրակիթառի համար գրած գործերից մեկը ունի Not Tied up (առանց կապի) անվանումը: Այն մեկուսացման, սահմանափակումների մեջ ծնված երաժշտության մասին է։

Ռոբերտը շրջափակման մեջ է նաև գրել էլեկտրակիթառի համար իր սոլոն, Ջիմի Հենդրիքսի հայտնի Little Wing երգի հիման վրա։

Արդեն 100 օրից ավելի շրջափակման մեջ գտնվող Արցախում 120․000-ից ավելի մարդկանց կյանքի բնական ընթացքը խաթարված է․ հարյուրավոր արցախցիներ իրենց նպատակները, ծրագրերը, երազանքները անորոշ ժամանակով հետաձգել են։ Անկախ դժվարություններից այստեղ շարունակում են ապրել, աշխատել և ստեղծագործել։ Ադրբեջանական կողմը անցած տարվա դեկտեմբերի 12-ից փակել է Արցախը արտաքին աշխարհի հետ կապող միակ՝ Գորիս-Ստեփանակերտ ճանապարհը։ Շրջափակման պատճառով մեկուսացված Արցախում առաջին անհրաժեշտության ապրաքների, դեղորայքի, վառելիքի խնդիր կա։ Դրան զուգահեռ Ադրբեջանը պարբերաբար խաթարում է Արցախի կենսական նշանակության ենթակառուցվածքները՝ գազի, էլեկտրաէներգիայի և կապի ու հաղորդակցության բնականոն աշխատանքները։ 

Մեկնաբանություններ (1)

Նախշուն
Ես վստահ եմ ,որ ձեր մոտ ամեն ինչ լավ է լինելու ։Ես ինքս հիմա Արցախում եմ իմ չորս տղաների, իմ հարազատների հետ։ Մենք Արցախը ապրեցնողներն ենք ու Աստված մեզ հետ է։ Աստված օգնական

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter