Չինաստանի արտաքին գործերի նախարարը հայտարարել է, որ Պեկինը զենք չի վաճառի Ուկրաինայում հակամարտության կողմերին և կվերահսկի երկակի նշանակության ապրանքների արտահանումը։

Ցին Գանը այսպես է արձագանքել ԱՄՆ-ի և մյուս երկրների այն մտահոգություններին, որ Չինաստանը, հնարավոր է, դիտարկում է Ռուսաստանին ռազմական օգնության ցուցաբերման հնարավորությունը, որին Պեկինն աջակցում է քաղաքական և հռետորական պլանում՝ պաշտոնապես հայտարարելով իր չեզոքության մասին։

«Ինչ վերաբերում է ռազմական արտադրության արտահանմանը, Չինաստանի հակված է զգույշ և պատասխանատու մոտեցմանը»,- հայտարարել է Ցին Գանը՝ Գերմանիայի արտաքին գործերի նախարար Անալենա Բերբոքի հետ համատեղ մամլո ասուլիսի ժամանակ։ 

«Չինաստանը զենք չի մատակարարի հակամարտության կողմերին և նաև կկառավարի ու կվերահսկի երկակի նշանակության ապրանքների արտահանումը՝ օրենքներին ու կանոններին համապատասխան»,- հավելել է նա։

Ցին Գանը նաև հաստատել է Չինաստանի պատրաստակամությունը նպաստելու հակամարտության խաղաղ կարգավորման բանակցություններին և հայտարարել, որ բոլոր կողմերը պետք է մնան «օբյեկտիվ և հանգիստ»։

2023 թվականի մարտի 20-22-ը Չինաստանի առաջնորդ Սի Ծինփինը գտնվում էր Մոսկվայում։ Այցի ընթացքում նա հանդիպել էր Ռուսաստանի նախագահ Վլադիմիր Պուտինին։ ԱՄՆ-ում հայտարարել էին, որ Մոսկվա Սի Ծինփինի այցը վկայում է այն մասին, որ Չինաստանը պատրաստում է «դիվանագիտական շղարշ»՝ Ուկրաինայում ռուսական հանցագործությունների համար։

2023 թվականի փետրվարին ԱՄՆ պետքարտուղար Էնթոնի Բլինքենը հայտարարել էր, որ Չինաստանը Ռուսաստանին տրամադրում է ոչ մահացու ռազմական օգնություն, ինչպես նաև դիտարկում զենքի մատակարարման հնարավորությունը։ Ամերիկյան The New York Times պարբերականը Ռուսաստան Սի Ծինփինի այցից առաջ հայտնել էր, որ չինական ընկերությունները ՌԴ-ին են վաճառում զենքեր ու անօդաչուներ, ինչպես նաև մատակարարում էլեկտրոնային կոմպոնենտներ, որոնք կարող են կիրառվել ռազմական նպատակներով։

Լուսանկարը՝ iStock-ից