Կոտայքի մարզի Ծաղկաձոր քաղաքի անտառապատ տարածքում ծանր տեխնիկայով ծառեր են արմատախիլ արվում։

«Հետք»-ի նկարահանող խումբը Ծաղկաձորից փոխանցում է, որ էքսկավատորով ծառերը քանդելուց բացի՝ ճանապարհ է բացվում դեպի անտառի խորքը։ Քանդման աշխատանքներն իրականացվում են Ծաղկաձորի Օլիմպիական փողոցում՝ օլիմպիական մարզահամալիր տանող ճանապարհի աջ մասում։ 

Անտառային տարածքում հողային աշխատանքներ կատարողները «Հետք»-ի լրագրողներին տեսնելուց հետո դադարեցրել են տեխնիկայի աշխատանքը, սակայն տարածքից լրագրողների հեռանալուց հետո՝ շարունակել:

Ստորև ներկայացված տեսանյութն ու լուսանկարները բավարար են Բնապահպանության և ընդերքի տեսչական մարմնի աշխատակիցների համար՝ տեղի ունեցողը դադարեցնելու և ուսումնասիրություն սկսելու համար։

Թարմացում․ Բնապահպանության և ընդերքի տեսչական մարմնի Իրազեկման և հանրության հետ տարվող աշխատանքների բաժնի պետ Նաիրա Աղաբաբյանը հայտնեց, որ տեսչական մարմինը «Հետք»-ի հրապարակման հիման վրա ուսումնասիրություն է սկսել։ Նյութերը փոխանցվել են տեսչական մարմնի տարածքային բաժին։

«Հետք»-ն առաջիկայում մանրամասներ կներկայացնի քանդման աշխատանքների պատվիրատուների, տարածքի նկատմամբ իրավունքներ ունեցողների վերաբերյալ։