Արցախի ԱԺ նախագահ Արթուր Թովմասյանի միջնորդությամբ Սամվել Բաբայանի կազմակերպած հանրահավաքի մասնակիցներն իրենց մտահոգություններն ու պահանջն են ներկայացրել Արցախի նախագահ Արայիկ Հարությունյանին։ Արդյունքում նախագահն առաջարկել է քաղաքական բոլոր ուժերի հետ խորհրդակցություն-քննարկումներ սկսել, որին Սամվել Բաբայանը ընդառաջել է ցնցումներից խուսափելու նպատակով։ Այսպես է արձագանքել Բաբայանի մամուլի ծառայությունը՝ «Հետքի» այն հարցին, թե ինչ են պատրաստվում անել նա և իր աջակիցները հետագա օրերին։

«Ակնալիքները, բնականաբար, համընկնում են հանրահավաքի ընթացքում և նրա անունից իշխանություններին փոխանցված հայտարարության բովանդակությունից, այն է՝ Սամվել Բաբայանին իր ներկայացրած ծրագերին համարժեք լիազորություններով նշանակել պետական նախարարի պաշտոնում։ Ի դեպ, վերջինիս նշանակումը լեգիտիմ է ոչ միայն հանրային աջակցության, այլև նրա՝ քաղաքական երկրորդ ուժը գլխավորած լինելու հանգամանքով։

Այսօրվանից մեկնարկում են քաղաքական խորհրդակցությունները, որոնց արդյունքների և հետագա քայլերի մասին հանրությունն անպայման տեղեկացված կլինի։ Իսկ հետագա քայլերն ու դրանց բնույթը լինելու են բանակցային փուլում ձեռք բերված հնարավոր համաձայնությունների հետևանքը և արձագանքը»,- ասվում է Բաբայանի մամուլի ծառայության հաղորդագրությունում։

Հիշեցնենք՝ մայիսի 15-ին, Արցախի անվտանգության խորհրդի նախկին քարտուղար, ՊԲ նախկին հրամանատար Սամվել Բաբայանն ու իր աջակիցները Ստեփանակերտում հանրահավաք էին կազմակերպել՝ պահանջելով Բաբայանին նշանակել Արցախի Հանրապետության պետնախարար։