2022 թվականի ընթացքում Վայքի համայնքապետն ընդհանուր 537 միլիոն դրամի պայմանագիր էր կնքել իր կնոջը պատկանող «Մավշին» ՍՊԸ-ի հետ։ Այդ մասին «Հետքի» հրապարակման հիման վրա քրեական վարույթ էր նախաձեռնվել, բայց պարզվում է, որ դրանից 10 ամիս անց վարույթի շրջանակում դեռևս ոչ ոք մեղադրյալի կարգավիճակ չունի։

Հիշեցնենք՝ 2022թ․ օգոստոսի 11-ին հրապարակած մեր հոդվածում գրել էինք, որ Վայքի համայնքապետարանը՝ ի դեմս համայնքի ղեկավար Մխիթար Մաթևոսյանի, 2022 թվականի ընթացքում 4 պայմանագիր է կնքել իր կնոջը պատկանող՝ «Մավշին» ՍՊԸ-ի հետ։ Պայմանագրերի ընդհանուր արժեքը կազմել է 537 միլիոն դրամ, և այդ գումարի դիմաց ընկերությունը պարտավորվել էր Վայք համայնքի բնակավայրերում տարբեր տեսակի շինարարական աշխատանքներ կատարել։ Ընդ որում՝ մինչև համայնքի ղեկավար ընտրվելը (2021թ․ դեկտեմբերի 5-ին), հենց Մխիթար Մաթևոսյանն է եղել այդ ընկերության միակ սեփականատերը։

«Հետքի» հոդվածն ուսումնասիրվել էր Գլխավոր դատախազության պետական շահերի պաշտպանության գլխավոր վարչությունում, որի արդյունքներով, 2022թ․ սեպտեմբերի 5-ին հանցանքի մասին հաղորդում էր ներկայացվել Քննչական կոմիտե։ Ներկայացված հաղորդումից հետո Վայոց ձորի մարզային քննչական վարչությունում 2022թ․ սեպտեմբերի 12-ին նախաձեռնվել էր քրեական վարույթ ՀՀ քրեական օրենսգրքի 441-րդ հոդվածի 2-րդ մասի 2-րդ և 4-րդ կետերի հատկանիշներով, այսինքն՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը պատճառել է առանձնապես խոշոր չափերի գույքային վնաս և կատարվել է մի խումբ պաշտոնատար անձանց կողմից նախնական համաձայնությամբ։

Վայոց ձորի մարզի դատախազի սեպտեմբերի 13-ի որոշմամբ՝ քրեական վարույթի նյութերը փոխանցվել էին Հակակոռուպցիոն կոմիտե։ Վարույթի հարուցումից մոտ 10 ամիս ոնց գրավոր հարցում ուղարկեցինք Հակակոռուպցիոն կոմիտե՝ խնդրելով հայտնել, թե ինչ փուլում է գտնվում գործը, ինչ է պարզել նախաքննական մարմինը և ով կամ ովքեր են գործով անցնող մեղադրյալները։

Մեր հարցմանն ի պատասխան՝ Հակակոռուպցիոն կոմիտեն հայտնել է, որ քրեական վարույթը դեռևս նախաքննության փուլում է, և այս պահի դրությամբ մեղադրյալի դատավարական կարգավիճակ ոչ ոք չունի։