Իրավական ակտերի նախագծերի հրապարակման e-draft.am կայքից անհետացել է Էկոնոմիկայի նախարարության նախագիծը, որով առաջարկվում է ՏՏ (տեղեկատվական տեխնոլոգիաներ) ոլորտի աշխատակիցների եկամտային հարկը դարձնել 5%։

Խոսքը այն ընկերությունների մասին է, որոնք «սնվում են» արտասահմանից՝ նրանց 80% և ավել համախառն եկամուտը գոյանում է Հայաստանի դուրս գտնվող աղբյուրներից։  

Հղումը, որով կարելի էր տեսնել նախագիծը, այժմ չի գործում։

Արդեն երկու օր է՝ Էկոնոմիկայի նախարարությունից փորձում ենք պարզել, թե ինչու՞ է նախագիծը հանվել՝ հե՞տ է կանչվել, լրամշակվելո՞ւ է, թե՞ առհասարակ հանվել է օրակարգից։ 

Նախարարը մամուլի քարտուղար չունի։ Լրատվամիջոցների հարցերով զբաղվող աշխատակիցը ևս հարցը լսելուց հետո արդեն երկու օր է՝ զանգերին չի պատասխանում։ Վարչություններից մեկից հաջողվեց պարզել, որ այս նախագծով զբաղվում է նախարարի տեղակալ Ռաֆայել Գևորգյանի աշխատակազմը, որի հեռախոսահամարին (նախարարության կայքում նշված համարին) ևս պատասխանող չկա։ Ստիպված ենք հարցը հրապարակային հղել։ Գուցե, նախարարությունից պատասխանող գտնվի։ 

Ներկայում Հայաստանում եկամտային հարկը 20% է։ ՏՏ շատ ընկերություններ օգտվում են 10% եկամտային հարկ վճարելու արտոնությունից։

Այս նախագիծը, որը հանրային քննարկման էր ներկայացվել e-draft.am կայքում, հանրության շրջանում բուռն քննադատությունների արժանացավ։ 

ՏՏ ոլորտի աշխատակիցները, որոնք արդեն իսկ օգտվում են պետական աջակցության ծրագրերից, 5% եկամտային հարկ վճարելով` արտոնյալ դիրքերում են հայտնվում մյուս աշխատող քաղաքացիների նկատմամբ։ Նույնիսկ, իրենց այն ՏՏ ոլորտի գործընկերների նկատմամբ, որոնց գործատու ընկերությունների վրա այս նախագիծը չէր տարածվելու։

• Արտոնությունների շքերթ ՏՏ ոլորտում

Բացի այդ, այս նախածի հիմքում չկար որևէ տնտեսական հիմնավորում։ 

• 5% եկամտային հարկ. ՏՏ ոլորտին աջակցող հերթական նախագիծը՝ առանց տնտեսական հիմնավորման

Գլխավոր լուսանկարը՝ mineconomy.am-ի