Իսրայելի պաշտպանության նախարար Յոավ Գալանտը Գազայի հատվածի հետ սահմանին զինվորականների հետ հանդիպման ժամանակ հայտարարել է, որ իսրայելական բանակը «իրավիճակը վերցրել է իր վերահսկողության տակ» և «անցնում է լայնամասշտաբ հարձակման»: Այդ մասին հայտնում են Haaretz-ը և The Times of Israel-ը։

«Ես հանել եմ բոլոր սահմանափակումները: «Համաս»-ը փոփոխություններ էր ցանկանում Գազայի հատվածում, և այն կփոխվի 180 աստիճանով՝ համեմատած նրա հետ, ինչ նախատեսում էին գրոհայինները: Նրանք կզղջան այս պահի համար: Գազան երբեք էլ առաջվանը չի լինի: Ով էլ գա գլխատելու, սպանելու կանանց և Հոլոքոստը վերապրած մարդկանց, մենք կոչնչացնենք նրանց»,- հայտարարել է Իսրայելի պաշտպանական գերատեսչության ղեկավարը։ 

Իսրայելցի նախարարը հավելել է, որ պատերազմը կարող է ձգվել «մի քանի շաբաթ կամ ամիսներ»։

«Համաս» արմատական շարժման գրոհայինները հոկտեմբերի 7-ի առավոտյան հարձակվեցին Իսրայելի վրա։ Նրանք մի քանի հազար հրթիռ են արձակել և ներխուժել սահմանամերձ շրջաններ՝ մարտի բռնվելով իսրայելցի զինվորականների հետ։ Ի պատասխան՝ Իսրայելի պաշտպանության բանակը սկսել է զանգվածային հարվածներ հասցնել Գազայի հատվածին։ Հարձակման օրը Իսրայելի վարչապետ Բենյամին Նեթանյահուն հայտարարեց, որ Իսրայելը մտնում է «երկար և դժվարին պատերազմի» մեջ: Նա նաև նշել էր, որ Իսրայելի պաշտպանության բանակը սկսել է նախապատրաստվել հարձակողական գործողության, որի նպատակը «Համաս»-ի լիակատար ոչնչացումն է:

Լուսանկարը՝ Իսրայելի ՊԲ մամուլի ծառայության