Քննչական կոմիտեն այսօր հայտնեց, որ ավարտվել է փաստաբան Մուշեղ Շուշանյանի կողմից հաղորդակցության առցանց հարթակների օգտագործմամբ, քաղաքական հայացքներով պայմանավորված, ՀՀ վարչապետի նկատմամբ բռնություն գործադրելու, բռնություններն արդարացնելու վերաբերյալ քրեական վարույթի նախաքննությունը։

Շուշանյանի պաշտպան Արայիկ Պապիկյանը «Հետքին» հայտնեց` ինչպես բազմաթիվ անգամ, այս անգամ ևս Շուշանյանը պնդում է, որ հնչեցված մտքերը կամ արտահայտությունները պայմանավորված չեն եղել վարչապետ Նիկոլ Փաշինյանի քաղաքական կամ այլ հայացքներով։ «Ավելին՝ վարչապետի պաշտոնը զբաղեցնող Փաշինյանը չունի և չի ունեցել քաղաքական հայացք, ինչը որևէ կերպ կարող է վերաբերել Հայաստանի կամ հայ ժողովրդի շահերին։ Հետևապես` նորմը չի կարող կիրառվել Շուշանյանի դեմ կամ նկատամբ»,- ասաց Պապիկյանը:

Նրա խոսքով` Շուշանյանի նկատմամբ հետապնդումը, ըստ էության, սկսվել էր դեռևս մայիսի 8-ին, երբ նրա ելույթի հիմքով քրեական վարույթ էր նախաձեռնվել, բայց մեղադրանք չէր ներկայացվել: Այնուհետև սեպտեմբերի 22-ի ֆեյսբուքյան գրառումն է կատարվել, որի հիմքով ևս մեկ վարույթ է նախաձեռնվել, իսկ սեպտեբերի 28-ին նրան ձերբակալել են դատարան չներկայանալու պատճառով։

«Այս ամենը ոչ միայն անհիմն է, այլ նաև՝ անհեթեթ։ Նախ` Շուշանյանը երբեք չի թաքնվել կամ խուսափել․ զորօրինակ մայիսի 8-ի կամ սեպտեմբերի 22-ի հրապարակումներից հետո նա որևէ տեղ չի թաքնվել, և նրա փախուստը կանխելու կամ դատարանին ներկայացնելու պատճառով ձերբակալելը պարզապես պատժելու նպատակով է կատարվել։ Մինչև սեպտեմբերի 28-ը նրան ոչ ոք չի էլ ծանուցել ներկայանալու, որից ինքը խուսափեր։ 

Մուշեղ Շուշանյանի կալանքը արտոնած դատավորը որոշման մեջ նշել է, որ նա, մնալով ազատության մեջ, կկատարի նոր հանցանք, և սա այն դեպքում, երբ Շուշանյանի վերաբերյալ օրինական ուժի մեջ մտած որևէ դատական ակտ չկա։ Դատավոր Մասիս Մելքոնյանը մոռացել է, որ ՀՀ-ում դեռևս գործում է անմեղության կանխավարկածը»,- ասաց փաստաբան Արայիկ Պապիկյանը:

Նշենք, որ Մուշեղ Շուշանյանը նախկինում ևս մեղադրվում էր ՀՀ վարչապետ Նիկոլ Փաշինյանին ուղղված հրապարակային եղանակով ծանր վիրավորանք եւ բռնության կոչեր հնչեցնելու մեջ: 

• Ծանր վիրավորանքի եւ բռնության կոչի մեղադրանքներ փաստաբան Մուշեղ Շուշանյանի նկատմամբ. տուժողը Նիկոլ Փաշինյանն է

«Ծանր վիրավորանքի» մասին հոդվածն ապաքրեականացվելուց հետո այդ մասով գործը կարճվել էր, իսկ մյուս մասով քրեական հետապնդումը դադարեցվել էր Շուշանյանի նկատմամբ` վաղեմության ժամկետն անցնելու հիմքով: Պաշտպանական կողմը դիմել էր Վերաքննիչ դատարան` պահանջելով բեկանել Առաջին ատյանի դատարանի դատավճիռը և կայացնել արդարացման վերաբերյալ դատական ակտ: 

Փաստաբան Արայիկ Պապիկյանը հայտնեց, որ Վերաքննիչի գործով բողոքի քննությունը նշանակված է նոյեմբերի 24-ին։

Նշենք, որ ընթացիկ քրեական վարույթով Մուշեղ Շուշանյանի նկատմամբ հարուցված է հանրային քրեական հետապնդում ՀՀ քրեական օրենսգրքի 330-րդ հոդվածի 2-րդ մասի 3-րդ կետով։ Նա այժմ կալանավորված է: Բռնության կոչեր են որակվել Շուշանյանի հետևյալ գրառումները. «Հայոց զարթոնքը կարող է սկսվել մի պայմանով միայն՝ եթե կիկոլը ու ողջ հայրենավաճառների խմբակը ինքնաբուխ տարերային կերպով մահապատժվեն»:

Մեկ այլ գրառման մեջ էլ Շուշանյանը գրել է. «կիկոլին, դրա կուտոկից ցանկացածին որտեղ բռնեք սատկացրեք, հնարավորինս դաժան, բայց նաև արդյունավետ, սաղ չմնան. աած, ոստիկանություն, սպասում եմ, եկեք, տարեք»:

Բացի այդ, ինչպես Քննչական կոմիտեն հայտնել է, 2023թ. մայիսի 9-ին «Ազգային ժողովրդավարական բևեռ» յութուբյան էջում զետեղվել է «Նիկոլի ֆիզիկական ոչնչացումը միանգամայն արդարացված է». Մուշեղ Շուշանյան» վերտառությամբ տեսանյութ, որի ընթացքում Շուշանյանը ՀՀ վարչապետի նկատմամբ, քաղաքական հայացքներով պայմանավորված, հնչեցրել է բռնություն գործադրելու հրապարակային կոչեր, արդարացրել նմանօրինակ գործողությունները:

Քրեական վարույթի նյութերն այժմ հսկող դատախազի մոտ են` մեղադրական եզրակացությունը հաստատելու և դատարան ուղարկելու նպատակով:

Գլխավոր լուսանկարում` փաստաբան Մուշեղ Շուշանյանը