Թուրքիայի նախագահ Ռեջեփ Թայիփ Էրդողանը երկրի խորհրդարան է ուղարկել Ադրբեջանում տեղակայված թուրք զինվորականների մանդատը ևս մեկ տարով երկարաձգելու օրինագիծը։ Այդ մասին հայտնում է թուրքական NTV հեռուստաընկերությունը։

Դրա համաձայն՝ «շարունակվում է 2020 թվականի նոյեմբերի 9-ին Ադրբեջանի, Հայաստանի և Ռուսաստանի կողմից <...> ստորագրված եռակողմ հայտարարությամբ նախատեսված միջոցառումների իրականացումը:

Օրինագծում նշվում է, որ Աղդամում տեղակայված ռուս-թուրքական համատեղ մոնիթորինգային կենտրոնում Թուրքիայի զինված ուժերի գործունեությունը «տարածաշրջանում Թուրքիայի կառուցողական դերի պահանջն է»:

Նշվում է, որ խորհրդարանի կողմից օրինագծի ընդունման պարագայում թուրքական բանակի մանդատը նոյեմբերի 17-ից սկսած կերկարաձգվի ևս մեկ տարով։ Սպասվում է, որ Թուրքիայի խորհրդարանն այն կքննարկի արդեն այս շաբաթ։

Արցախում հրադադարի պահպանման վերահսկողության ռուս-թուրքական միացյալ մոնիթորինգային կենտրոնի ստեղծման մասին հուշագիրը ստորագրվել է 2020 թվականի նոյեմբերի 11-ին՝ ՌԴ պաշտպանության նախարար Սերգեյ Շոյգուի և Թուրքիայի Ազգային պաշտպանության նախարար Հյուլուսի Աքարի բանակցությունների արդյունքում։ Կենտրոնը պետք է հետևեր Լեռնային Ղարաբաղում հրադադարի ռեժիմի պահպանմանը։

Նոյեմբերի 17-ին էլ Թուրքիայի խորհրդարանը հավանություն էր տվել նախագահի հրամանի նախագծին, որով ենթադրվում էր թուրքական ստորաբաժանումների ուղարկում Ադրբեջան։ Նախատեսվում է, որ թուրք զինծառայողների հերթափոխը տեղի կունենա ամեն տարի։

2021 թվականի հունվարի 31-ին կենտրոնը սկսեց իր աշխատանքները։ Ինչպես փոխանցում էր ռուսական կողմը, համատեղ կենտրոնի անձնակազմը, որը հավասարապես բաղկացած է ռուսական և թուրքական կողմերի ներկայացուցիչներից, իրավիճակի վերահսկողությունը իրականացնում է նաև անօդաչու թռչող սարքերի միջոցով։

Լուսանկարը՝ ՌԴ ՊՆ մամուլի ծառայության