Երևան քաղաքի առաջին ատյանի ընդհանուր իրավասության քրեական դատարանում այսօր՝ նոյեմբերի 16-ին, տեղի ունեցավ փաստաբան Մուշեղ Շուշանյանի գործով դատական նիստը: Նախագահող դատավորն էր Արտուշ Գաբրիելյանը:

Մուշեղ Շուշանյանը մեղադրվում է ՀՀ վարչապետ Նիկոլ Փաշինյանի հասցեին բռնության կոչեր հնչեցնելու մեջ: Նա այժմ կալանավորված է:

Շուշանյանը դատարանին հայտնեց, որ քննիչն իրենց չի տրամադրել գործի բոլոր նյութերը: Դրանցում բացակայել է իր վերջին հարցաքննության տեսաձայնագրության էլեկտրոնային կրիչը: «Նման պայմաններում դատալսումները չեն կարող կայանալ, և ես խնդրում եմ դատալսումները հետաձգել, իմ իրավունքի խախտումը վերացնել, պաշտպանիս տրամադրել հարցաքննության տեսաձայնագրության էլեկտրոնային կրիչը, որից հետո հաջորդ դատական նիստում կարող ենք շարունակել նախնական դատալսումները»,- ասաց Մուշեղ Շուշանյանը: 

Հանրային մեղադրող Վազգեն Ռուստամյանն ասաց, որ իր տեղեկություններով՝ քննիչը քրեական վարույթի նյութերը տրամադրել է պաշտպանության կողմին: Մուշեղ Շուշանյանի պաշտպան Արայիկ Պապիկյանն էլ հայտնեց, որ այդ հարցով դիմել է թե քննիչին, թե դատարանին, սակայն ոչ մեկից չի կարողացել ստանալ: Դատարանը հայտնեց, որ իր մոտ առկա նյութերում կա այդ տեսաձայնագրությունը, այն կտրամադրի պաշտպանական կողմին ու ժամանակ կտա՝ դրան ծանոթանալու:

Հանրային մեղադրող Վազգեն Ռուստամյան

Արայիկ Պապիկյանը հայտնեց նաև, որ Շուշանյանից անձնական խուզարկության ժամանակ գրպանի որոշակի գումար են վերցրել, որը մինչ օրս քննիչը չի վերադարձրել: «Սա ցույց է տալիս այն վերաբերմունքը, որ ցուցաբերվում է պարոն Շուշանյանի նկատմամբ, և ինչու՞ է նա այս պահին բանտում՝ մենք չգիտենք»,- ասաց Պապիկյանը:

Դատական նիստը հետաձգվեց տեսաձայնագրության էլեկտրոնային կրիչը պաշտպանական կողմին փոխանցելու և նրանց այդ ձայնագրությանը ծանոթանալու հնարավորություն տալու հիմքով: Հաջորդ նիստը տեղի կունենա նոյեմբերի 24-ին՝ ժամը՝ 15:00-ին:

Դատավոր Արտուշ Գաբրիելյան

Նշենք, որ բռնության կոչեր են որակվել Շուշանյանի հետևյալ գրառումները. «Հայոց զարթոնքը կարող է սկսվել մի պայմանով միայն՝ եթե կիկոլը ու ողջ հայրենավաճառների խմբակը ինքնաբուխ տարերային կերպով մահապատժվեն»:

Մեկ այլ գրառման մեջ էլ Շուշանյանը գրել է. «կիկոլին, դրա կուտոկից ցանկացածին որտեղ բռնեք, սատկացրեք, հնարավորինս դաժան, բայց նաև արդյունավետ, սաղ չմնան. աած, ոստիկանություն, սպասում եմ, եկեք, տարեք»:

Բացի այդ, ինչպես Քննչական կոմիտեն հայտնել է, 2023թ. մայիսի 9-ին «Ազգային ժողովրդավարական բևեռ» յութուբյան էջում զետեղվել է ««Նիկոլի ֆիզիկական ոչնչացումը միանգամայն արդարացված է». Մուշեղ Շուշանյան» վերտառությամբ տեսանյութ, որի ընթացքում Շուշանյանը ՀՀ վարչապետի հասցեին, քաղաքական հայացքներով պայմանավորված, հնչեցրել է բռնություն գործադրելու հրապարակային կոչեր, արդարացրել նմանօրինակ գործողությունները: Սակայն Շուշանյանը պնդում է, որ հնչեցված մտքերը կամ արտահայտությունները պայմանավորված չեն եղել վարչապետ Նիկոլ Փաշինյանի քաղաքական կամ այլ հայացքներով։

Պաշտպան Արայիկ Պապիկյանը Շուշանյանի ձերբակալությունը և կալանքը անհիմն է որակել: «Այս ամենը ոչ միայն անհիմն է, այլև՝ անհեթեթ։ Նախ` Շուշանյանը երբեք չի թաքնվել կամ խուսափել․ զորօրինակ մայիսի 8-ի կամ սեպտեմբերի 22-ի հրապարակումներից հետո նա որևէ տեղ չի թաքնվել, և նրա փախուստը կանխելու կամ դատարանին ներկայացնելու պատճառով ձերբակալելը պարզապես պատժելու նպատակով է կատարվել։ Մինչև սեպտեմբերի 28-ը նրան ոչ ոք չի էլ ծանուցել ներկայանալու, որից ինքը խուսափեր։ 

Մուշեղ Շուշանյանի կալանքը արտոնած դատավորը որոշման մեջ նշել է, որ նա, մնալով ազատության մեջ, կկատարի նոր հանցանք, և սա այն դեպքում, երբ Շուշանյանի վերաբերյալ օրինական ուժի մեջ մտած որևէ դատական ակտ չկա։ Դատավոր Մասիս Մելքոնյանը մոռացել է, որ ՀՀ-ում դեռևս գործում է անմեղության կանխավարկածը»,- «Հետքին» հայտնել էր փաստաբան Արայիկ Պապիկյանը:

Մուշեղ Շուշանյանը նախկինում ևս մեղադրվում էր ՀՀ վարչապետ Նիկոլ Փաշինյանին ուղղված հրապարակային եղանակով ծանր վիրավորանք եւ բռնության կոչեր հնչեցնելու մեջ: 

• Ծանր վիրավորանքի եւ բռնության կոչի մեղադրանքներ փաստաբան Մուշեղ Շուշանյանի նկատմամբ. տուժողը Նիկոլ Փաշինյանն է

«Ծանր վիրավորանքի» մասին հոդվածն ապաքրեականացվելուց հետո այդ մասով գործը կարճվել էր, իսկ մյուս մասով քրեական հետապնդումը դադարեցվել էր Շուշանյանի նկատմամբ` վաղեմության ժամկետն անցնելու հիմքով: Պաշտպանական կողմը դիմել էր Վերաքննիչ դատարան` պահանջելով բեկանել առաջին ատյանի դատարանի դատավճիռը և կայացնել արդարացման վերաբերյալ դատական ակտ: 

Գլխավոր լուսանկարում՝ Մուշեղ Շուշանյանը և Արայիկ Պապիկյանը

Կարդացե՛ք նաև՝

• «Հնչեցված մտքերը պայմանավորված չեն եղել Նիկոլ Փաշինյանի քաղաքական կամ այլ հայացքներով». Մուշեղ Շուշանյանի պաշտպան