Վարչապետ Նիկոլ Փաշինյանը հույս ունի, որ Ադրբեջանից հնչող ագրեսիվ հայտարարությունների նպատակը խաղաղության գործընթացը դիտավորյալ փակուղի մտցնելը չէ։ Այս մասին Ազգային ժողով-Կառավարություն հարցուպատասխանի ժամանակ հայտարարել է վարչապետ Նիկոլ Փաշինյանը։ Նրա խոսքով՝ Հայաստանն ու Ադրբեջանը խոսում են դիվանագիտական տարբեր լեզուներով, սակայն նպատակը պետք է լինի՝ դիվանագիտությունները համապատասխանեցնել լեգիտիմությանը։

Նիկոլ Փաշինյանը շեշտում է, որ Հայաստանի և Ադրբեջանի միջև դելիմիտացիայի գործընթացը պետությունների միջև նոր սահման չի ստեղծելու, քանի որ այդ սահմաններն արդեն իսկ ամրագրվել են 1991 թվականի Ալմա-Աթայի հռչակագրով, որով խորհրդային պետությունների միջև առկա վարչական սահմանները դարձել են պետական սահմաններ։ Ըստ Փաշինյանի՝ դելիմիտացիայի միջոցով արդեն իսկ գոյություն ունեցող սահմանները պետք է վերարտադրվեն տեղանքում, քարտեզների և թղթերի վրա՝ համաձայն Ալմա-Աթայի հռչակագրի։