Վրաստանի իշխող «Վրացական երազանք» կուսակցությունը կրկին խորհրդարանի բյուրոյի օրակարգ է մտցրել և գրանցել «օտարերկրյա գործակալների» մասին վիճահարույց օրինագիծը։ Այդ մասին հայտնում է Mtavari Arkhi հեռուստաալիքը:

Խորհրդարանի իրավաբանական հանձնաժողովը օրինագիծը կքննարկի ապրիլի 12-ին: Ինչպես նշում է հեռուստաալիքը, խորհրդարանի բյուրոյի նիստը, որտեղ «Վրացական երազանքը» մեծամասնություն է կազմում, տեղի է ունեցել նախաձեռնության կրկնակի քննարկման դեմ բողոքների ֆոնին:

Paper Kartul-ը հայտնել է, որ խորհրդարանի շենքի մոտ է եկել մոտ 150 մարդ, որոնք դեմ են «Օտարերկրյա գործակալների մասին» օրինագծին։

Ակցիայի մասնակիցները պարզել են «Մենք ընտրում ենք Եվրոպան, այլ ոչ թե Ռուսաստանը» գրությամբ պաստառներ, ծածանել Վրաստանի և Եվրամիության դրոշները, ինչպես նաև վանկարկել «ո՛չ ռուսական օրենքին»:

Հիշեցնենք, որ «Վրացական երազանք» կուսակցության գործադիր քարտուղար Մամուկա Մդինարաձեն ապրիլի 3-ին հայտարարել էր, որ խորհրդարանի օրակարգ դարձյալ բերում են «օտարերկրյա գործակալների» մասին վիճահարույց օրինագիծը։ նախաձեռնությունը կներկայացվի նույն տեքստով, ինչ օրենքի նախագիծը, որը հետ էր կանչվել 2023 թվականի գարնանը՝ բողոքի ակցիաներից հետո։

Մեկ տարի առաջ ներկայացված օրինագծի տեքստը նախատեսում էր, որ Վրաստանում կստեղծվի «օտարերկրյա գործակալների» ռեեստր, որտեղ նշված կլինեն բոլոր ոչ առևտրային իրավաբանական անձինք և ԶԼՄ-ները, որոնք ֆինանսավորման ավելի քան 20 %-ը գալիս է արտերկրից։

Այդ կազմակերպությունները պետք է հրապարակեին տարեկան ֆինանսական հաշվետվություն: Խախտման դեպքում նրանց համար ֆինանսական պատժամիջոցներ էին նախատեսվում։ 

Առաջին անգամ «օտարերկրյա գործակալների» մասին օրինագիծը նախաձեռնվել էր 2023 թվականի փետրվարին, իսկ մարտի սկզբին Վրաստանի խորհրդարանն այն ընդունել էր առաջին ընթերցմամբ։ Դրանից հետո Թբիլիսիում սկսվել էին զանգվածային բողոքի ցույցեր, որոնց ժամանակ ոստիկանությունը ձերբակալել էր մարդկանց, բողոքի ցույցերը ցրել ջրցան մեքենաներով և արցունքաբեր գազ կիրառել:

Օրինագիծը դատապարտել էին ԱՄՆ-ն և Եվրամիությունը։ Մի քանի օր անց օրինագիծը հետ էր կանչվել «հասարակության շրջանում տարաձայնությունների» պատճառով։

Արևմուտքը շարունակում է քննադատել վրացական իշխանությունների այս նախաձեռնությունը, իսկ Գերմանիան անուղղակիորեն հայտարարել է, որ օրինագծի ընդունման պարագայում Վրաստանը կարող է զրկվել ԵՄ թեկնածու երկրի կարգավիճակից։

Լուսանկարը՝ Վրաստանի խորհրդարանի մամուլի ծառայության