Հայկական «Ֆլայ Արնա» ավիաընկերությունը («Հայկական ազգային ավիաուղիներ» ՓԲԸ), որի գլխին սկսեցին սեւ ամպեր կուտակվել նախորդ տարեվերջին, այսօր վերջնականապես զրկվեց կոմերցիոն գործունեություն ծավալելու առանցքային փաստաթղթից՝ օդանավ շահագործողի վկայականից (ՕՇՎ): Այս մասին տեղեկանում ենք Քաղավիացիայի կոմիտեի (ՔԱԿ) կայքից։ 

Հիշեցնենք, որ ՔԱԿ-ն այս տարվա մարտի 7-ին 6 ամսով կասեցրել էր ավիափոխադրողի ՕՇՎ-ի գործողությունը, քանի որ ընկերությունը չուներ օդանավ: Ըստ ՀՀ օրենսդրության, ՕՇՎ ունեցող ավիաընկերությունը պետք է լինի առնվազն մեկ օդանավի սեփականատեր կամ վարձակալ (ենթավարձակալ) կամ գոնե ունենա օդանավի վարձակալության (ենթավարձակալության) մասին հուշագիր, այլապես նրա ՕՇՎ-ի գործողությունը կկասեցվի առավելագույնը 6 ամսով, եւ այս ընթացքում փոխադրողը պետք է քայլեր ձեռնարկի՝ օրենսդրական նշված պահանջը բավարարելու համար: Չբավարարելու դեպքում նրա վկայականի ուժը կորցրած կճանաչվի:

Ավիաընկերությունը ՕՇՎ ստացել էր 2022 թ. մայիսի 5-ին, իսկ կոմերցիոն թռիչքները մեկնարկել էր նույն տարվա հուլիսի 3-ին: Վերջին նման թռիչքը եղել է այս տարվա հունվարի 16-ին, ինչից հետո «Ֆլայ Արնայի» միակ ինքնաթիռը կանգնած էր «Զվարթնոց» օդանավակայանում: Փետրվարի 26-ին այս բորտը տեղափոխվել է Շարժա, իսկ մարտի 6-ին դուրս է բերվել հայկական ռեգիստրից: Սրա հիման վրա էլ ՔԱԿ-ը կասեցրել է ավիաընկերության ՕՇՎ-ի գործողությունը:

Այդուհանդերձ, նախորդ տարեվերջից արդեն պարզ էր, որ լուրջ կոնֆլիկտ կա հայ-արաբական օպերատորի շուրջ: Հիշեցնենք, որ «Ֆլայ Արնայի» 49 %-ը պատկանում է «Հայաստանի պետական հետաքրքրությունների ֆոնդ» ՓԲԸ-ին (ԱՆԻՖ), որը պետական հիմնադրամ է, 49 %-ն էլ պատկանում է արաբական «International Business Company (FZE)»-ին, որը փոխկապակցված է «Air Arabia» ավիաընկերությանը: Փաստացի հենց արաբական այս փոխադրողն է համարվում «Ֆլայ Արնայի» բաժնետեր: Մնացած 2 %-ը պատկանում է ՀՀ քաղաքացի Վարուժան Ներգիզյանին, որը լիբանանահայ տնտեսագետ ու գործարար է, ԱՄԷ-ի, Լիբանանի եւ Մերձավոր Արեւելքի այլ երկրների բիզնես շրջանակների ներկայացուցիչ է:

«Հետքը» գրել է, որ ԱՆԻՖ-ի եւ «Air Arabia»-ի միջեւ հակասություններ են ծագել համատեղ ձեռնարկության կառավարման ու ֆինանսական ներդրումների հարցերի շուրջ, ինչն էլ հանգեցրել է դրա գործունեության դադարեցմանը:

• Ինչու՞ փակվեց «Ֆլայ Արնան». արդյոք այն չդիմացավ մրցակցությանը, ինչպես ասում է Փաշինյանը
• Ինչու՞ ձախողվեց հայ-արաբական «Ֆլայ Արնան». Կառավարության արձագանքն ու աշխատողների բացահայտումները

Ներկայում քննարկումներ են ընթանում «Ֆլայ Արնայի» լուծարման վերաբերյալ, սակայն, դատելով իրադարձություններից, հայկական ու արաբական կողմերը համաձայնության չեն գալիս: Նկատենք, որ վատ վիճակում է նաեւ ավիաընկերության հայկական բաժնետեր ԱՆԻՖ-ը, որը եւս լուծարման ճանապարհին է:

«Ֆլայ Արնան» իր գործունեության ընթացքում հասցրել է նաեւ պարտքեր կուտակել, եւ պարտատերերի թվում առանձնանում են ավիաընկերության շուրջ ինը տասնյակ աշխատակիցները: Վերջիններս հայտնվել են հայկական ու արաբական բաժնետերերի վեճի արանքում ու այս պատմության մեջ ամենաշատ տուժողներից են:

Լուսանկարում՝ «Ֆլայ Արնայի» ինքնաթիռները՝ «Զվարթնոցում» (արխիվ, ավիաընկերության ֆեյսբուքյան էջից)