Դոնալդ Թրամփը, որը Սպիտակ տանը հանդիպել է ԱՄՆ գործող նախագահ Ջո Բայդենի հետ, նրա հետ քննարկել է «երկու հարց, որոնց շուրջ նրանք անցյալում տարաձայնություններ են ունեցել»։ Այդ մասին գրում է New York Post-ը՝ հղում անելով հենց Թրամփին։ Խոսքն Ուկրաինայում և Մերձավոր Արևելքում ծավալվող պատերազմների մասին է։

Զրույցի մանրամասները Թրամփը չի ներկայացրել։ Նա պատմել է, որ հարցրել է Ուկրաինայի պատերազմի վերաբերյալ Բայդենի կարծիքը և լսել այն։ «Բացի այդ, մենք շատ ենք խոսել Մերձավոր Արևելքի մասին։ Ես ուզում էի իմանալ նրա կարծիքը այն մասին, թե որտեղ ենք գտնվում մենք: Եվ նա ինձ տեղեկացրեց դրա մասին, նա շատ սիրալիր էր»,- հավելել է Թրամփը։

Թրամփի խոսքով՝ հանդիպումը շատ երկար է տևել ու դա «երկու կողմերի մեծ աշխատանք էր»։ «Նա (Ջո Բայդենը՝ խմբ.) շատ լավ աշխատանք կատարեց քարոզարշավի և մնացած ամեն ինչի վերաբերյալ: Մենք իսկապես շատ լավ հանդիպում ունեցանք»,- ասել է Թրամփը։

Թրամփի և Բայդենի հանդիպումը տեղի է ունեցել Սպիտակ տան օվալաձև աշխատասենյակում։ Գործող նախագահը շնորհավորել է Թրամփին՝ ընտրություններում հաղթանակի կապակցությամբ և նրա հետ քննարկել իշխանության փոխանցումը՝ խոստանալով, որ այն «սահուն» կլինի: Թրամփը հայտնել է, որ իրենք նախատեսում են ևս մեկ անգամ հանդիպել իր երդմնակալությունից անմիջապես առաջ:

Թրամփի երդմնակալության արարողությունը նախատեսված է 2025 թվականի հունվարի 20-ին: Ընդ որում, ընտրված նախագահն արդեն սկսել է ձևավորել իր ապագա վարչակազմն ու հայտարարել առանցքային պաշտոններում մի քանի նշանակումների մասին:

Լուսանկարը՝ Evan Vucci/The Associated Press գործակալություն