Քաղաքացիական ակտիվիստ, «Armenia Today» լրատվական կայքի համակարգող Արգիշտի Կիվիրյանին այսօր հերթական անգամ հրավիրել էին ՀՀ գլխավոր դատախազություն՝ Հատուկ քննչական ծառայությունում հարցաքաննության՝ օգոստոսի 24-ին Կոմիտասի 5-ի ապօրինի շինարարության դեմ պայքարի ընթացքում տեղի ունեցած միջադեպի կապակցությամբ:

Չնայած, որ Կիվիրյանին որպես վկա են կանչել ՀՔԾ, նա համոզված է, որ իր հանդեպ քաղաքական հետապնդում է իրականացվում. գործ են ուզում սարքեն գլխին, ինչպես նշեց նա լրագրողների հետ զրույցի ժամանակ:

Ի տարբերության նախորդ անգամվա, երբ Արգիշտի Կիվիրյանը եկել էր հարցաքննության 30 փաստաբանների հետ` այս անգամ նրա հետ ՀՔԾ մտավ մեկ փաստաբան՝ իր կինը՝ Լուսինե Սահակյանը: Մնացած փաստաբանները, ինչպես նաև քաղաքացիական մի խումբ ակտիվիստներ, դատախազության շենքի առաջ են. սպասում են հարցաքննության ավարտին: Հարցաքննության արդյունքը, ինչպես նաև Կիվիրյանի հետագա ճակատագիրն անհանգստացնում է նաև Կոմիտասի 5-ի հարակից շենքերի բնակիչներին, որոնց իրավունքների պաշտպանության ընթացքում էր տեղի ունեցել ակտիվիստի հետ կապված այս միջադեպը: Կոմիտասցիներն առավոտվանից դատախազության շենքի առաջ էին՝ Արգիշտի Կիվիրյանին սատարելու նպատակով: