Վաղը Լենինգրադյան 52 շենքի հարակից այգում պաշտոնապես կբացվի կիսանդրի-հուշարձան՝ նվիրված հայ լեյտենանտ Գուրգեն Մարգարյանին, ով սպանվել էր 2004 թ.-ի փետրվարի 19-ին ադրբեջանցի սպայի կողմից: Միջոցառումն իրենց ներկայությամբ կպատվեն պաշտոնատար անձինք, միջազգային կազմակերպությունների ներկայացնուցիչներ, հրապարակախոսներ, հայ-ադրբեջանական հարաբերությունների կարգավորմամբ հետաքրքրված արտասահմանցիներ, Գուրգենի ընկերները: Միջոցառումը բաց է մամուլի համար:

2004 թվականի հունվարի 11-ից Գուրգենը Բուդապեշտում մասնակցում էր ՆԱՏՕ-ի «Գործընկերություն հանուն խաղաղության» ծրագրի անգլերենի եռամսյա դասընթացներին: Գուրգենի ծառայակիցը՝ ադրբեջանցի, մարդասպան Ռամիլ Սաֆարովը, ով նույնպես մասնակցում էր դասընթացին, կացնի 16 հարվածներով սպանել է քնած հայ սպային: 2006 թվականին Բուդապեշտի Քաղաքային դատարանը Սաֆարովին դատապարտեց ցմահ ազատազրկման՝ առանց ներման իրավունքի 30 տարվա ընթացքում: Չնայած միջազգային հանրության վրդովմունքին ու նախազգուշացումներին՝ ոճրագործն արտահանձնվեց իր երկիր, որտեղ էլ ներում ստացավ և ազատ արձակվեց հենց օդանավակայանում:

***

Գուրգեն Մարգարյանը ծնվել է Երևանում: Հայաստանի պետական ​​ճարտարագիտական ​​համալսարանի բակալավրի աստիճան ստանալուց հետո զորակոչվել է Հայաստանի զինված ուժեր՝ որպես ժամկետային զինծառայող, ապա որոշում է մնալ Զինված ուժերում և վաստակում սպայի կոչում: