2014թ. հունվարի 1-ից, «Կուտակային կենսաթոշակների մասին» ՀՀ օրենքի փոփոխության համաձայն, բոլոր նրանք, ովքեր ծնվել են 1974թ. կամ դրանից հետո, պարտադրված են լինելու իրենց զուտ աշխատավարձի 6.6-ից մինչև 13 %-ը փոխանցել կենսաթոշակային մասնավոր ֆոնդերին՝ 63 տարեկանից հետո հետ ստանալու պայմանով:

Այսօր ԱԺ-ի ընդդիմադիր եւ ԲՀԿ խմբակցության պատգամավորների նախաձեռնությամբ պետք է տեղի ունենար արտահերթ նիստ՝ կուտակային կենսաթոշակին վերաբերող օրենսդրական փաթերթը քննարկելու եւ գործընթացը մեկ տարով հետաձգելու վերաբերյալ:

Սակայն նիստը տապալվեց՝ կոալիցիոն գործընկերներ ՀՀԿ-ի եւ ՕԵԿ-ի բոյկոտի հետևանքով:

ԱԺ շենքի դիմաց հավաքվել էին բազմաթիվ քաղաքացիներ՝ իրենց բողոքն արտահայտելու պարտադիր կուտակային կենսաթոշակայային համակարգի ներդրման դեմ: Ցուցարարները երթով շարժվեցին նաև դեպի ՀՀ կառավարություն, այնուհետև ՀՀԿ կուսակցության գլխավոր գրասենյակ:

Քաղաքացիների կազմակերպած բողոքի ակցիային ճանապարհին միանում էին բազմաթիվ այլ մարդիկ` պարզապես անցորդներ, ովքեր, տեղեկանալով երթի մասնակիցների բարձրաձայնած պահանջների մասին, անցնում էին ցուցարարների շարքերը: