HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

ԱԳՆ-ն՝ Զվարթնոցի «կորպորատիվ փարթիի» մասին

Հունիսի 14-ին «Զվարթնոց» պատմամշակութային արգելոց-թանգարանի տարածքում տեղի ունեցած միջոցառումից հետո «Հետքը» դիմել էր ՀՀ ՅՈւՆԵՍԿՕ-ի գործերով ազգային հանձնաժողովի գլխավոր քարտուղար Վահրամ Կաժոյանին: Հանձնաժողովը գործում է ԱԳՆ-ի կազմում, իսկ դրա նախագահը արտաքին գործերի նախարար Էդվարդ Նալբանդյանն է:

Հիշեցնենք, որ Զվարթնոցն ընդգրկված է ՅՈւՆԵՍԿՕ-ի համաշխարհային ժառանգության ցանկում: Կառավարության մեր աղբյուրի փոխանցմամբ՝ եթե ՅՈւՆԵՍԿՕ-ն  նմանատիպ թեկուզ մեկ միջոցառման մասին տեղեկանա, ապա Զվարթնոցը կարող է հանվել ժառանգության ցանկից: Վ. Կաժոյանը մեր հարցերին չպատասխանեց, փոխարենը խորհուրդ տվեց հարցերն ԱԳՆ-ին ուղղել գրավոր:

Ներկայացնում ենք ԱԳՆ-ի՝ «Հետքի» գրավոր հարցերի պատասխանները՝ Հայաստանում ՅՈւՆԵՍԿՕ-ի գործունեության և Զվարթնոցի դեպքերի մասին:

-Ո՞ր թվականից է գործում Հայաստանի ՅՈՒՆԵՍԿՕ-ի գործերով ազգային հանձնաժողովը, ի՞նչ գործունեություն եք ծավալում: Խնդրում եմ՝ առանձնացրել հանձնաժողովի կատարած աշխատանքից երեք կետ:

-ՅՈւՆԵՍԿՕ-ի գործերով Հայաստանի ազգային հանձնաժողովի ստեղծման որոշումը կայացվել է 1991 թ.: Հայաստանի ազգային հանձնաժողովի քարտուղարությունը գտնվում է ՀՀ ԱԳՆ կազմում` որպես միջազգային կազմակերպությունների վարչության ՅՈւՆԵՍԿՕ-ի բաժին: Նշված վարչության պետն ի պաշտոնե նաև հանձնաժողովի գլխավոր քարտուղարն է: Ինչպես այլ երկրներում Հանձնաժողովի նախագահն ի պաշտոնե ՀՀ արտաքին գործերի նախարարն է: 

Հանձնաժողովի հիմնական գործառույթներն են.

Հայաստանի Հանրապետության շահերից բխող դիրքորոշումների ներկայացում ՅՈւՆԵՍԿՕ-ի, այդ թվում գլխավոր կոնֆերանսի շրջանակներում, ինչպես նաև ՅՈւՆԵՍԿՕ-ի օժանդակ մարմիններում ՀՀ անդամակցության ապահովումը: Ներկայումս ՀՀ-ն ընտրված է զինված հակամարտության դեպքում մշակութային արժեքների պաշտպանության կոմիտեում, ՅՈւՆԵՍԿՕ-ի մշակութային ինքնաարտահայտման ձևերի բազմազանության պաշտպանության և խրախուսման միջկառավարական կոմիտեում ու կրթության միջազգային բյուրոյում:

Հայաստանում ՅՈւՆԵՍԿՕ-ի մանդատի ներքո ծրագրերի իրականացման համակարգում.

Ակտիվ համագործակցություն է իրականացվում Հայաստանում ՅՈւՆԵՍԿՕ-ի ասոցացված դպրոցների ցանցի (ASPnet) (մասնավորապես ներկայումս շարունակվում է «Ճանաչիր աշխարհի մշակույթներն ու երկրները» ծրագիրը), ամբիոնների և ակումբների հետ` աջակցելով դրանց մասնակցությանը ՅՈւՆԵՍԿՕ-ի ծրագրերում և նախաձեռնություններում իրականացնում է զանազան ծրագրեր շահագրգիռ գերատեսչությունների ու կառույցների հետ (ներկայումս ընթացքում է «Ուսուցում հանուն ապագայի» պիլոտային ծրագիրը):

Հանձնաժողովի աշխատանքի շնորհիվ «Համաշխարհային ժառանգության» գրանցամատյանում են ընդգրկված ել Հաղպատի  ու Սանահինի վանական համալիրները, Գեղարդի վանական համալիրն ու Ազատ գետի վերին հովիտը  և Էջմիածնի Մայր տաճարը և եկեղեցիներն, Զվարթնոցի հնագիտական վայրը (2000թ.):

ՅՈւՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում գրանցվել «Սասնա ծռեր կամ Սասունցի Դավիթ» էպոսի կատարողական դրսևորումները»,  «Խաչքարի խորհուրդը և խաչքարագործությունը» և «Դուդուկի երաժշտությունը»:

«Աշխարհի հիշողություն» ծրագրի Միջազգային ռեգիստրում գրանցվել են «Կոմպոզիտոր Արամ Խաչատրյանի ձեռագիր նոտաները և կինոերաժշտությունը», աստղագետ «Բենիամին Մարգարյանի գալակտիկաների մասին ուսումնասիրությունը» և Մեսրոպ Մաշտոցի անվան Մատենադարանի ամբողջ հավաքածուն:

Հանձնաժողովի համակարգմամբ իրականցվել է Հայաստանի մասնակցությունը ՅՈւՆԵՍԿՕ-ի մի շարք գիտակրթական և մշակութային ծրագրերին, նախաձեռնություններին և միջոցառումներին։

Ազգային հանձնաժողովի կողմից համակարգմամբ՝ ՅՈւՆԵՍԿՕ-ի ֆինանսավորմանն են  ներկայացվել ծրագրային առաջարկներ, որոնցից միայն 2012-2013 թթ. 81000 ԱՄՆ դոլարի չափով ֆինանսավորում է տրամադրվել Հայաստանի տարբեր ոլորտներում նախագծերի իրականացման համար:

-Ինչպիսի՞ վերահսկողություն եք իրականացնում:

-ՅՈւՆԵՍԿՕ-ի շրջանակներում ազգային հանձնաժողովի հիմնական գործառույթներն են` խորհրդատվության և տեղեկատվության տրամադրում և տարածում, իրազեկում, գործունեության համակարգում, աջակցություն ՅՈւՆԵՍԿՕ-ի ծրագրերի իրականացմանը:

-Քանի՞ անդամ ունի հանձնաժողովը:

-Հանձնաժողովն առաջնորդվում է 1994թ. ՀՀ ԱԳ նախարարի կողմից հաստատված կանոնադրությամբ: Ժամանակի ընթացքում անհրաժեշտություն է առաջացել վերանայելու հանձնաժողովի կազմն ու գործող կանոնադրությունը: Ներկայումս ազգային հանձնաժողովի նոր կանոնադրության ու կազմի նախագծերը գտնվում են հաստատման փուլում: Նորացված կազմը ներառելու է ՀՀ ԱԳՆ-ի, մշակույթի, կրթության և գիտության, էկոնոմիկայի, բնապահպանության, սպորտի և երիտասարդության հարցերի, Հայաստանի գիտությունների ազգային ակադեմիայի, քաղաքապետարանի, Մատենադարանի, Մայր Աթոռ Սուրբ Էջմիածնի և այլ շահագրգիռ կառույցների ներկայացուցիչներին:

-Զվարթնոց տաճարի մոտ արդեն տարիներ շարունակ կազմակերպում են բաց և փակ միջոցառումներ, այդ թվում՝ հարսանյաց արարողություններ, խնջույքներ: Տեղյա՞կ եք այդ միջոցառումներից: Ի՞նչ քայլեր եք ձեռնարկում:

-«Զվարթնոց» պատմամշակութային արգելոց-թանգարանի կառավարումը, պահպանությունը և անվտանգության ապահովումն իրականացվում է ՀՀ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի կողմից: Զվարթնոցի տարածքում իրականացվող միջոցառումների կազմակերպումը չի համաձայնեցվում ՅՈւՆԵՍԿՕ-ի գործերով ազգային հանձնաժողովի հետ:

-Վտանգ կա, որ հունիսի 14-ին Զվարթնոցում տեղի ունեցած միջոցառման հետևանքով այն կարող է հանվել ՅՈւՆԵՍԿՕ-ի համաշխարհային ժառանգության ցանկից: Ի՞նչ քայլեր եք անում այդ ուղղությամբ:

-Համաշխարհային ժառանգության գրանցամատյանում ընդգրկված հուշարձանների ընդգրկմամբ հանրային միջոցառումներն ընդունված են նաև այլ երկրներում:

Յուրաքանչյուր երկիր համաշխարհային ժառանգության գրանցամատյանում գրանցված իր հուշարձանների պահպանման վերաբերյալ պարբերական զեկույցներ է ներկայացնում ՅՈւՆԵՍԿՕ-ի կենտրոնակայան: Ցանկից հանելու նախաձեռնությունը արվում է այն պարագայում, երբ հուշարձանի վիճակը խիստ վատթարացել է, և տվյալ պետությունը չի ձեռնարկել բոլոր անհրաժեշտ միջոցառումները՝ հուշարձանի պաշտպանությունն ապահովելու համար:

-Որտե՞ղ կարող ենք կարդալ  հանձնաժողովի տարեկան հաշվետվությունները:

-Հաշվետվության ամփոփումը մատչելի է ՅՈւՆԵՍԿՕ-ի կայքէջում:

Մեկնաբանություններ (1)

Ashot
Ի՞սկ եթե պետությունը կոնկրետ միջոցներ է ձեռնարկում հուշարձանի հերը անիծելու համար։ Նշեմ կոնկրետ օրինակ՝ Գեղարդի վանական համալիրի հազարանյա աստիճանները ուղղակի բետոնապատել են ու մեջն էլ արմատուրաներ։ Հիմա կարելիա էտ արմատուրաները հատ հատ հանել ու մտցնել դրա համար պատասխանատուների ․․․․․․․․․

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter