HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Եվս մեկ մերժում՝ Սողոմոն Քոչարյանի գործով. այն կվիճարկվի դատարանում

20-րդ տարին ազատազրկման մեջ գտնվող Սողոմոն Քոչարյանի քրեական գործը չի վերաբացվի:

Նա ևս մեկ մերժում է ստացել գլխավոր դատախազությունից. այս անգամ ՀՀ գլխավոր դատախազի տեղակալ Էմիլ Բաբայանից, ով որպես վերադաս դատախազ որոշում է կայացրել Քոչարյանի ներկայացուցիչ Ռոբերտ Ռևազյանի բողոքը մերժելու մասին: Այս մասին «Հետքին» տեղեկացրեց Հայաստանի Հելսիկյան կոմիտեի փաստաբան, Քոչարյանի ներկայացուցիչ Ռոբերտ Ռևազյանը, ով օրերս է ստացել մերժումը:

Բողոքարկումների շղթան սկսվել էր, երբ «Հետքը» դատարանների արխիվում ուսումնասիրել էր հետախույզ, Արցախյան պատերազմի մասնակից, 2-րդ կարգի հաշմանդամ, իրանահպատակ ադրբեջանցու սպանության մեղադրանքով 20-րդ տարին բանտում գտնվող 48-ամյա Սողոմոն Քոչարյանի վերաբերյալ քրեական գործը: Մեղադրանքը 20 տարի առաջ Գերագույն դատարանում պաշտպանած Ժիրայր Խառատյանը իր ինքնակենսագրականում անդրադարձել էր այդ գործին՝ պնդելով, որ 1995 թ.-ին գլխավոր դատախազության վրա Իրանի դեսպանի կողմից ճնշում է եղել՝ մահապատժի պահանջով: Այս հիմքով «Հետքի» գլխավոր խմբագիր Էդիկ Բաղդասարյանը դիմել էր ՀՀ գլխավոր  դատախազին նոր երևան եկած հանգամանքով վարույթ նորոգելու խնդրանքով: Սակայն գլխավոր դատախազությունն արդեն երկրորդ անգամ մերժում է մոտ 20 տարվա վաղեմության գործը վերաբացել այդ հիմքով:

Գլխավոր դատախազությունը համարում է, որ 1995 թ.-ին մեղադրանքը Գերագույն դատարանում պաշտպանած դատախազ Ժիրայր Խառատյանի՝ մոտ 20 տարի անց հայտնած ինֆորմացիան՝ քաղաքական ճնշման մասին, նոր երևան եկած հանգամանք չի կարող դիտվել: Հետևաբար, ըստ գլխավոր դատախազության, Ժիրայր Խառատյանի հայտնածը վարույթի նորոգման հիմք չի կարող լինել:

Մերժման հիմքում վերադաս դատախազը դրել է նույն փաստարկները, ինչ դատախազ Գ. Բաղդասարյանը: Հիմնավորումն այն է, որ դատարանն է կայացնում դատական ակտը, և անգամ եթե դատախազ Խառատյանը չպահանջեր մահապատժի  դատավճիռ, դա որևէ կերպ չէր կարող կաշկանդել դատավոր Մհեր Խաչատրյանին:

«Ավելի պարզ՝ Սողոմոն Քոչարյանի նկատմամբ մահապատիժ կարող էր նշանակվել նաև դրա վերաբերյալ մեղադրողի միջնորդության բացակայության դեպքում»,- նշված է մերժման որոշման մեջ:

Բացի դրանից՝ վերադաս դատախազը նշել է, որ Ժիրայր Խառատյանի անհամաձայնությունը՝ կապված պատժատեսակին, չի բովանդակում Սողոմոն Քոչարյանի նվազ մեղավոր լինելու մասին ապացույց:

Փաստաբան Ռևազյանը տեղեկացրեց, որ դարձյալ պատրաստվում է վիճարկել մերժման որոշումը դատական կարգով՝ նույն դատարանում (Կենտրոն և Նորք-Մարաշ վարչական շրջանների ընդհանուր իրավասության դատարան):

«Այս անգամ դատարանը չի կարող չանդրադառնալ իմ բողոքի բովանդակային մասին, քանի որ արդեն սպառել ենք բողոքարկման՝ օրենքով սահմանված բոլոր հնարավորությունները: Նորից մենք պնդում ենք, որ Սողոմոն Քոչարյանի մահապատժի դատավճիռը քաղաքական միջամտության հետևանք է, որ եղել է մեկ այլ պետության կողմից, ինչն աննախադեպ երևույթ է»,- ասաց փաստաբանը:

Հիշեցնենք, որ Կենտրոն և Նորք-Մարաշ վարչական շրջանների ընդհանուր իրավասության դատարանը (դատավոր՝ Արմեն Բեկթաշյան) պարտավորեցրել էր գլխավոր դատախազությանը վերացնել Սողոմոն Քոչարյանի խախտված իրավունքները՝ նկատի ունենալով վերադաս դատախազին բողոքարկելու հնարավորության ընձեռումը:

«Վերադաս դատախազի մերժման որոշման մեջ դարձյալ նշված չեն բողոքարկման կարգն ու ժամկետները, բայց մենք մի քանի օրվա մեջ բողոք կներկայացնենք դատարան»,- «Հետքի» հետ զրույցում նշեց փաստաբան Ռևազյանը՝ հիշեցնելով, որ նույն գործով գլխավոր դատախազությունում է գտնվում նաև իր ներկայացրած հաղորդումը հանցագործության մասին:

Հ.Գ. Այս հրապարակումը պատրաստ էր, երբ Սողոմոն Քոչարյանի մայրը՝ Զինա Քոչարյանը, ով «Նուբարաշեն» ՔԿՀ-ի ճանապարհին էր, որդուն դեղեր ու սնունդ էր հասցնում, մեզ փոխանցեց հետևյալը. «Մինչև Սողոմոնս անընդհատ մերժումներ ա ստանում, նրա առողջական վիճակը գնալով վատանում ա: Ստամոքսի խոց ունի, մարսողություն չկա, սիրտը վատ ա: Սողոմոնս լուրջ բժշկական հետազոտությունների կարիք ունի: Հիմա գնում եմ բանտ, համ էլ տեսնեմ բժիշներին: Գրեք թերթում, որ ես խնդրում եմ գոնե տղայիս առողջական հարցերը լուծեն: Համարյա 20 տարի փակի տակ… բերանով ես ասում: Հաշմանդամ մարդուն անգամ թոշակից են զրկել 20 տարի, ոչ էլ անձնագիր են տալիս… ո՞ր մեկն ասեմ»: 

Մեկնաբանություններ (6)

ՀԱՅՈՒՀԻ
անթասիբ իշխանություններ, փոխանակ հերոսի կոչում տան այս մարդուն, ծակն են խոթել, ինչ է մի ազերի անասւոնի է սատկացրել։ ռամիլ սաֆարովի օրինակից գոնե ամաչեք, մեջներդ մի քիչ թասիբ արթնանա, այ անխիղճներ
ՀԱՅՈՒՀԻ
բայց ինչ ամոթ է, ազգովի քխայտառակ ենք լինում, ազերիները կարդում են էս նյութերն ու ուրախանում, որ մեր իշխանություններն էսպես են վարվում իրենց ազատամարտիկների հետ, անգլերենով էլ մեզ թուքումուր են տալիս, ինչ անթասիբ են մեր արդարադատությւոն իրականացնողները, ԱՄՈԹ ՁԵԶ ու ձեր սերունդներին
Herepta
How the Armenian justice system works: Azeri killers of Armenians are honoured greatly, esteemed highly and rewarded generously by Azeri governments. Armenian killer of an Azeri gets life sentence from its own government with no prospect of parole. Are there any more Armenians still willing to migrate and settle in our MISERABLE little Armenia ??? Yes , of course; but only those with rocks in their heads.
Liana
Տեր Աստված խնդրում եմ, աղաչում եմ ազատություն տուր այն մարդուն
Վեհարի
ԵՎ այսքանից հետո ինչ որ մեկը հայ լինելով, համոզված է, թե մեր իշխանությունը չի ծառայում մեր թշնամիներին:
hasmik
չեն անելու, արդեն սերժիկը որոշել է

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter